Messi FIFA ofisiga uzr so‘rab bormoqchi emas

«Barselona» hujumchisi Lionel Messi Argentina terma jamoasining 4 o‘yinidan diskvalifikatsiya qilinishi yuzasidan berilgan apellyatsiyasi ko‘riladigan majlisda qatnashish uchun FIFA qarorgohiga bormaslikka qaror qildi.

Argentina futbol assotsiatsiyasi (AFA) prezidenti Klaudio Tapia 29 yoshli futbolchi bilan uchrashib, agar u Tsyurixga borib kechirim so‘raydigan bo‘lsa, FIFA uning diskvalifikatsiyasini qisqartirishi mumkinligini aytgandi.

Ammo Messi FIFA qarorgohiga borib kechirim so‘ramoqchi emasligini bildirgan.

AFA Messining hakamni «fohishaning bolasi» deya haqorat qilmagani, aslida boshqa so‘z ishlatganini aytmoqda.

Eslatib o‘tamiz, «Barselona»ning 29 yoshli hujumchisi o‘yin vaqtida hakamga nisbatan haqoratli so‘zlarni ishlatgani uchun 4 o‘yinga diskvalifikatsiya qilingandi.

FIFA tartib-intizom qo‘mitasi majlisi 4 may kuni Tsyurixda bo‘lib o‘tishi belgilangan.