Tramp AQSh manfaatlariga javob bermaydigan barcha kelishuvlarni bekor qilishga va'da berdi

AQSh prezidenti Donald Tramp 29 apreldagi nutqida AQSh manfaatlariga javob bermaydigan barcha kelishuvlarni bekor qilib, yangi muzokaralar boshlashga va'da berdi.

"Biz yangi muzokaralar boshlaymiz va AQSh manfaatlariga javob bermaydigan barcha kelishuvlarni bekor qilamiz", deb aytdi Tramp Garrisberg shahrida (Pensilvaniya shtati) tarafdorlari oldida so‘zlagan nutqida.

Tramp, jumladan, Meksika va Kanada bilan erkin savdo kelishuvi (NAFTA) bo‘yicha yangi muzokaralar boshlashga va'da berdi. U bundan hammaga yaxshi bo‘lishiga umid bildirdi. 

"Ko‘p yillar davomida biz NAFTA’da Kanada va Meksikaga nisbatan noto‘g‘ri tomonda bo‘lganmiz. Bunga o‘zimiz yo‘l qo‘yganmiz. Hozir biz yangi muzokaralar boshlamoqchimiz. Agar biz kompaniyalarimiz va ishchilarmiz uchun yaxshi kelishuvga erisha olmasak, unda NAFTA’ning amal qilishini to‘xtatamiz", deb aytdi Tramp. 

Tramp, shuningdek, Trans-Tinch okeani hamkorligi bo‘yicha kelishuvni ham "dahshatli va falokatli" deb atadi. Tramp prezidentlik lavozimiga kirishishi bilanoq bu kelishuvdan chiqishga qaror qilgandi.

Tramp shu bilan birga yaqinda AQShda mamlakatga xorijdan alyuminiy va po‘lat yetkazilishi bo‘yicha antidemping (demping – bozorni egallash uchun narxlarni sun'iy ravishda pasaytirish) tergovlari boshlanganini eslatib o‘tdi. "Biz har bir bitimni o‘rganmoqdamiz. Agar biror noto‘g‘ri holatni aniqlasak, zudlik bilan ish ko‘ramiz", deb aytdi Tramp.