Kardiffga Madriddan yo‘l. YeChL markaziy uchrashuvi haqida

Bugun Yevropa chempionlar ligasining 1/2 finaliga dastlabki uchrashuvi bo‘lib o‘tadi. Dastlabki uchrashuvda Madridning ikki jamoasi o‘zaro to‘qnash keladi. Tribuna.Uz final ostonasida dastlabki to‘qnashuvga batafsil to‘xtaladi.

«Real» – «Atletiko» (2 may, 23:45, UzReport, Match TV, Match! Futbol 1)

Yevropa chempionlar ligasi finalida ketma-ket to‘rtinchi marta ispan jamoasi finalda o‘ynashi aniq bo‘ldi. Ammo so‘nggi uch yildagi finalda ikki marta kuzatilgan ispancha final bu safar bo‘lmaydi. Chunki o‘tgan yilgi finalchilar bu safar yarim finalda o‘zaro hisob-kitob qilib oladigan bo‘ldi. 

O‘yindan oldin

Atletiko

Diyego Simeone uchun Madrid derbisining eng muhim ikki uchrashuvi faqat yomon xotiralar bilan qolgan. Serxio Ramosning so‘nggi soniyalarda kiritgan goli va ikkinchisidagi birgina 11 metrlik jarima zarbasi o‘yin taqdirini hal qilgan to‘qnashuvlar. «Real»dan YeChLda qabul qilib olinadigan yana bir mag‘lubiyatga Simeone chiday olmasa kerak. Diyego YeChL finalida ketma-ket ikki mag‘lubiyat uning uchun qattiq zarba bo‘lgani, faqatgina chempionlar ligasi unga motivatsiya berib turganini juda ko‘p marotaba ta'kidlab keladi. Navbatdagi mag‘lubiyat uning Madriddagi sabr kosasini to‘ldirib yuborsa kerak.

Real

«Bavariya» «Real» uchun o‘zining kuchiga munosib baho bera olish imkonini yaratdi. Aynan myunxenliklar Zidan jamoasiga qulay bo‘lib chiqdi. «Real» tezkor qarshi hujumlar evaziga raqibni shoshirib qo‘ydi. Albatta, afsus bilan aytish mumkin, bu uchrashuv ko‘proq Viktor Kashshaining hakamligi bilan eslanadi. Ammo hakamlik qanchalik qo‘pol xatolar bilan ko‘ringan bo‘lmasin, «Real» qarama-qarshiliklarda keyingi bosqichga chiqishga haqlidek taassurot uyg‘otgandi. «Atletiko» bu borada aynan o‘ta noqulay raqiblar sirasiga kiradi. Zidan jamoasi ikkinchi raqamda o‘ynashni qanchalik yaxshi ko‘rsa, «matraschilar» bu ishning hadisini olishgan va hamshaharlariga bunday o‘yin ko‘rsatishga bermasligi aniq. Hozirgi «Atletiko» to‘pni nisbatan yaxshi nazorat qiladi. Ammo muhim o‘yinlarda jamoa o‘tgan mavsumda bo‘lgani kabi «Barselona» va «Bavariya»ni musobaqadan chiqarib yuborgan ultrahimoyaviy o‘yin uslubiga tayanib o‘ynashini kutish mumkin.

Bu qarama-qarshilikda yana bir faktorni hisobga olish kerak – chempionlik poygasi. «Real» La-liga «oltin»lari uchun «Barselona» bilan jiddiy kurash olib bormoqda, «Atletiko» kuzdagi natijalari evaziga allaqachon bu kurashdan chiqib ketgan. Yevrokubokdagi g‘alaba – Diyego Simeone jamoasining bu mavsumdagi yagona maqsadi sanaladi.

O‘zaro uchrashuvlar tarixi

Yevrokuboklarda ikki jamoa o‘rtasidagi to‘qnashuvlar tarixi titkilansa birinchi navatda darhol ikki final uchrashuvi yodimizga tushadi. Ammo jamoalar bundan tashqari 2014/2015 yilgi mavsumda YeChL chorak finalida ham o‘zaro ro‘baro‘ kelishgan. «Visente Kalderon»da hisob ochilmagan bo‘lsa, «Bernabeu»da yagona gol o‘yin taqdirini mezbonlar foydasiga hal qilgandi. Umumiy yevrokuboklar statistikasi «Atletiko» uchun quyidagicha: «Real»ga qarshi yevrokubok pley-offlarida 4ta to‘qnashuv (1959-yilda ham uchtalik o‘yinda «Real» g‘olib chiqqan) barchasida «qaymoqranglilar» uchun kerakli natija bilan tugagan.

Qiziqarli faktlar

— «Atletiko» YeChL pley-offida ketma-ket 10 uchrashuvdirki to‘p o‘tkazib yubormayapti. Diyego Simeone jamoasi so‘nggi marta 2014 yilning martida «Milan»dan (Kaka gol urgandi) gol o‘tkazganidan buyon o‘z uyida faqat va faqat quruq seriya o‘tkazmoqda.

— Ammo «Real» ketma-ket 55 uchrashuvdan buyon gol urishning uddasidan chiqib kelmoqda. Agar bu statistikani bo‘lajak o‘yingacha saqlab qolsa, qaysidir uzoq davom etgan seriyaning tugashiga guvoh bo‘lamiz.

— Bu ikki jamoaning yevrokuboklardagi 5-uchrashuvi bo‘ladi.

— Bu Madrid jamoalarining 28 marta yevrokuboklar yarim finalida ishtirok etishi bo‘ladi.

— «Real» ketma-ket 7 marta YeChL yarim finalida ishtirok etadi.

— «Real» YeChLda 14 uchrashuvdan buyon mag‘lubiyatga uchramayapti (9G‘, 5D).

Yo‘qotishlar

«Real» tarkibida Garet Beyl maydonga tusha olmaydi. Shuningdek Pepe ham jarohati sabab bu uchrashuvni o‘tkazib yuborishiga to‘g‘ri keladi. Rafael Varan esa umumiy guruh mashg‘ulotlariga qaytgan.

«Atletiko» tarkibida Xuanfran, Xose Ximenes va Fernandes jarohati sabab uchrashuvni o‘tkazib yuboradi. Shime Vrsalkoning ishtiroki esa so‘roq ostida qolmoqda

Taxminiy tarkiblar

«Real» chempionatda dam bergan Isko xizmatidan bu uchrashuvda foydalanishi kutilmoqda. Shuningdek Rafael Varan jarohatlardan so‘ng asosiy tarkibga qaytishi kerak. «Atletiko» tarkibida esa o‘ng qanotning ikki vakili ham jarohat olgani sabab Ernandes bu o‘rinni egallashi kutilmoqda.

Real Madrid: Navas; Karvaxal, Ramos, Varan, Marselo; Kroos, Kazemiro, Modrich; Isko, Benzema, Ronaldu.

Atletiko: Oblak; Ernandes, Godin, Savich, Filipe Luis; Saul Ngiyes, Koke, Gabi, Ferreyra-Karrasko; Grizmann, Gameyro.