Xitoyning ilk avialayneri birinchi parvozini amalga oshiradi

Xitoyda ishlab chiqarilgan birinchi yo‘lovchi samolyoti C919 5 mayda ilk parvozini amalga oshiradi, deb xabar bermoqda Shanghai Daily nashri.

O‘tgan haftada birinchi sinov parvozi may oyiga belgilangani ma'lum qilingandi, biroq aniq sana aytilmagandi.

Shanxayning Shanghai ERC News Radio radiostansiyasining ma'lum qilishicha, parvoz Shanxaydagi Pudan aeroportidan amalga oshiriladi. 

Avvalroq C919 Pudan aeroportidagi uchish-qo‘nish yo‘lakchasida tezlik sinovlaridan o‘tgandi. Yanvar boshida samolyotning sinov parvozlari fevralda boshlanishi ma'lum qilingandi, biroq belgilangan vaqtda parvozlar amalga oshirilmagan.

2016 yil noyabrida samolyot dvigatelining sinovlari yakunlangandi. Ma'lum qilinishicha, samolyotning barcha texnik sinovlari 2017 yilda yakunlanadi va shundan keyin samolyot foydalanishga topshiriladi. Shuningdek, samolyot tijoriy foydalanishga 3 yil davom etadigan sinov parvozlaridan keyin topshirilishi ma'lum qilingandi.   

C919 avialayneri tejamkor-sinfdagi 158 kishilik magistral samolyot loyihasi bo‘lib, samolyotning uchish uzoqligi 5,5 ming km ni tashkil qiladi. Samolyot Xitoyning COMAC korporatsiyasi tomondan amalga oshirilmoqda. Oxirgi ma'lumotlarga ko‘ra, korporatsiya 570 ta bunday samolyot uchun buyurtma olgan. Korporatsiya kelajakda hammasi bo‘lib bu samolyotdan kamida 2 ming dona sotishni rejalashtirgan.