Johnson & Johnson mahsulotidan saratonga uchragan ayolga 110 mln dollar tovon puli to‘lanadi

AQShning Missuri shtati Sent-Luis shahri sudi Johnson & Johnson kompaniyasi saraton bilan xastalangan ayolga 110 mln dollar miqdorida tovon to‘lash to‘g‘risida hukm chiqardi. Kompaniya tomonidan ishlab chiqarilgan va tartibida talk bo‘lgan mahsulot sabab ayol ushbu xavfli kasallikka chalingani aytiladi. Bu haqda Reuters xabar qilmoqda.

Sud majlisida ishtirok etgan ayolning so‘zlariga ko‘ra, u J&J tomonidan ishlab chiqilgan va tarkibida talk bo‘lgan kukunni 40 yil mobaynida har kuni qo‘llagan. 2012 yilda unga tuxumdonlar saratoni tashxisini qo‘yishgan, keyinchalik o‘simtalar jigarga tarqalgan. Ayni vaqtda bemor kimyoviy davolash kursini o‘tamoqda. 

O‘z navbatida, kompaniya rahbariyati ayolga hamdardlik bildirar ekan, sud qaroridan norozi ekanini ma'lum qildi. 

Ta'kidlanishicha, 110 mln dollar miqdoridagi tovon puli Sent-Luis sudida ko‘rib chiqilayotgan shu kabi 2,4 ming holat ichida eng yuqori miqdordir.