АҚШ Марказий қўмондонлиги (CENTCOM) Эрон ҳудудидаги ҳарбий нишонларга қарши навбатдаги кенг кўламли ҳужумлар амалга оширилганини маълум қилди. Ҳарбий амалиётлар кетма-кет ўнинчи кун давом этмоқда.
CENTCOM маълумотига кўра, ҳужумларнинг асосий мақсади Эроннинг Ҳўрмуз бўғозида фуқаролик кемаларига таҳдид солишда қўлланилаётган ҳарбий салоҳиятини янада заифлаштиришдан иборат.
Кейинчалик АҚШ ҳарбийлари операция якунланганини маълум қилиб, зарбалар Эрон ҳарбий қўмондонлик пунктлари, ракета ва учувчисиз учиш аппаратлари (дронлар)ни учириш майдончалари, шунингдек, ҳаво ҳужумидан мудофаа тизимларига қаратилганини билдирди.
Бу орада Эрон ҳам навбатдаги жавоб ҳужумларини амалга оширди. Хабарларга кўра, мамлакат Форс кўрфази минтақасида жойлашган АҚШ ҳарбий базаларига қарши ракета ва дронлардан фойдаланган. Кувайт ва Иордания ҳудудларида ҳам ракета ва дрон ҳужумлари қайд этилган.
18 июл куни Теҳрон июн ойида Вашингтон билан эришилган вақтинчалик сулҳ келишувини амалдан қолган деб эълон қилди. Мазкур келишув 60 кун ичида якуний тинчлик битимини имзолаш учун асос бўлиши керак эди.
АҚШ президенти Доналд Трамп янги ҳужумлардан бир неча соат олдин Эронни америкалик ҳарбийлар ҳалок бўлган ҳар қандай ҳолат учун «бир неча баробар жавоб қайтариш» билан огоҳлантирди. Унинг таъкидлашича, бу бўйича кўрсатма мудофаа вазири Пит Ҳегсетга етказилган.
Трампнинг айтишича, навбатдаги зарбалар Эрон билан тўқнашувларда ҳалок бўлган АҚШ ҳарбийлари хотирасига жавоб сифатида амалга оширилган. CENTCOM маълумотларига кўра, янги можаро бошланганидан буён АҚШнинг 17 нафар ҳарбий хизматчиси ҳалок бўлган.
Шу билан бирга, Ҳўрмуз бўғозидаги вазият ҳам таранглигича қолмоқда. Эрон Ислом инқилоби муҳофизлари корпуси (ИИМК) икки нефт танкерини ушлаб қолганини маълум қилди. Расмий Теҳрон бу кемалар бўғоздан ноқонуний ҳаракатланишга уринганини билдирган.
Ҳарбий қарама-қаршилик кучайиши ортидан Ҳўрмуз бўғози орқали кема қатнови ҳам сезиларли даражада қисқарган. Лондон фонд биржаси маълумотларига кўра, 19 июл куни бўғоздан атиги тўртта, 18 июл куни эса саккизта кема ўтган. Бу дунё нефт бозори учун стратегик аҳамиятга эга йўлакдаги хавфсизлик билан боғлиқ хавотирлар кучайиб бораётганини кўрсатмоқда.
