Afg‘oniston sharqida joylashgan Jalolobod shahrida jangarilar teleradiokompaniyaga hujum qildi. Bu haqda TOLOnews telekanali xabar tarqatdi.
Qayd etilishicha, hujum Nangarhar viloyati markazida amalga oshirilgan.
Guvohlar teleradiokompaniya atrofida otishma davom etayotganini ma'lum qilishgan. Ushbu teleradiokompaniya binosi viloyat gubernatori uyi yaqinida joylashgan.
Hozircha bu hujum qaysi guruh tomonidan amalga oshirilgani ma'lum emas. Qurbonlar va jarohatlanganlar haqida ham hozircha aniq ma'lumot berilmadi.
28 aprel kuni «Tolibon» bahorgi hujumlarni boshlagani haqida e'lon qilgandi. Tolibonlar «xorijiy kuchlar va ularning ichkaridagi yollanma kuchlariga qarshi» urush olib borishni va'da qilishgan.
