Air India aviakompaniyasi sotuvga qo‘yildi

Hindiston hukumati oxirgi yillarda katta qarzga botgan Air India aviakompaniyasini xususiylashtirishga ruxsat berdi.

Hindiston moliya vaziri Arun Jyeytlining ma'lum qilishicha, Hindiston hukumati aviakompaniyaning to‘liq yoki qisman sotilishini ma'qullagan. Endi kompaniyaning qanday ulushini va qanday shartlarda sotish masalasiga aniqlik kiritib olish kerak.

Hukumat Air India’ni ko‘p yillar davomida xususiylashtirishga harakat qilib kelgan, biroq ichki muxolifat qarshiligiga va xususiy sarmoyachilar tomondan qiziqish yo‘qligiga duch kelgan.

Aviakompaniya 2007 yildan beri ziyon ko‘rib keladi va ayni vaqtda uning qarzlari 7 mlrd dollardan oshib ketgan. Oxirgi 6 yil ichida Hindiston byudjyetidan aviakompaniyani qo‘llab-quvvatlash uchun 3,6 mlrd dollar ajratilgan. Uning Hindiston bozoridagi ulushi 2007 yildagi 35 foizdan 2017 yildagi 14 foizgacha tushib ketgan.