Soliq qo‘mitasi raddiya berdi: Qo‘mita mustaqil faoliyatini davom ettiradi

O‘zbekistonda soliq ma'muriyatchiligi qayta ko‘rib chiqiladi. O‘zbekiston Prezidentining «Soliq ma'muriyatchiligini tubdan takomillashtirish, soliqlar va boshqa majburiy to‘lovlarning yig‘iluvchanligini oshirish chora-tadbirlari to‘g‘risida»gi farmonida keltirilgan.

Davlat soliq qo‘mitasi matbuot xizmati qo‘mita faoliyati keskin o‘zgarishi haqidagi xabarlarga raddiya berdi.

O‘zbekistonda Davlat soliq qo‘mitasida o‘zgarishlar kutilayotgani, qo‘mita Moliya vazirligi yoki Bosh prokuratura tarkibiga o‘tkazilishi mumkinligi haqida ma'lumotlar tasdiqlanmadi.

«Soliq qo‘mitasi tashkiliy jihatdan boshqa biron vazirlikka bo‘ysundirilmaydi. Qo‘mitaning avvalgi maqomi saqlanib qoladi - avvalgidek Vazirlar Mahkamasi tarkibidagi mustaqil, alohida qo‘mita. Prezident farmoniga ko‘ra, qo‘mita faoliyati yanada takomillashtirilib, modernizatsiyalashtiriladi. Sohaga axborot texnologiyalari jalb etiladi», dedi «Kun» muxbiri bilan suhbatda bo‘lgan qo‘mita matbuot kotibi.

Prezident farmoniga ko‘ra, O‘zbekiston Davlat soliq qo‘mitasi tuzilmasida quyidagicha o‘zgarishlar ro‘y bergan.

Bozorlar va savdo komplekslari faoliyatini nazorat qilish bosh boshqarmasi hamda Chakana savdo va xizmat ko‘rsatish sohasida naqd xorijiy valyuta muomalasiga yo‘l qo‘ymaslik ustidan nazorat qilish, qisqa muddatli tekshirishlarni tashkil etish bo‘yicha maxsus boshqarma negizida Chakana savdo va xizmat ko‘rsatish sohasida huquqbuzarliklarni profilaktika qilish bosh boshqarmasi tashkil etildi.

Axborot-tahlil bosh boshqarmasining Texnik boshqarmasi negizida Axborot-kommunikatsiya texnologiyalari bosh boshqarmasi tuzildi.

Axborot-tahlil bosh boshqarmasi Tahlil va prognozlashtirish bosh boshqarmasiga, Soliq solish metodologiyasi boshqarmasi Metodologiya va soliq organlarini modernizatsiya qilish boshqarmasiga, Axborot xizmati Jamoatchilik bilan aloqalar va huquqiy axborot bo‘limiga, Yuridik bo‘lim Yuridik boshqarmaga aylantirildi va uning tarkibida Qoraqalpog‘iston, viloyatlar va Toshkent shahar davlat soliq boshqarmalarida tegishli bo‘linmalari (sho‘'balari) bo‘lgan soliq nizolarini sudgacha hal etish bo‘limi ochildi.

Soliq organlari faoliyatiga zamonaviy AKTni joriy etish uchun mas'ul bo‘lgan DSQ raisining o‘rinbosari — AKT bosh boshqarmasi boshlig‘i lavozimi joriy etildi.

1 yanvardan boshlab davlat soliq xizmati organlari xodimlari turar joy ijarasi uchun har oylik pulli badal va imtiyozli shartlar asosida turar joy xarid qilish uchun uzoq muddatlik ipoteka kreditlarini olish huquqidan foydalanishlari mumkin. Ushbu huquqdan ayni damda sudyalar va prokuratura organlari xodimlari foydalanib kelmoqda.