Olimlarning ma'lum qilishicha, Bolgariya Yevropadagi eng dangasa mamlakat hisoblanadi. O‘tkazilgan so‘rovnomaga ko‘ra, Bolgariyada yashovchi katta yoshlilarning 78 foizi jismoniy faollikka umuman vaqt ajratmaydi. Shvetsiyaliklar esa, aksincha, eng faol millat hisoblanar ekan. "Ortodoks" nashri shu haqidagi ma'lumoti bilan bo‘lishdi.
Tadqiqotchilar bunday xulosaga kelgunga qadar 28 Yevropa mamlakatidagi ming nafar kishi o‘rtasida so‘rovnoma o‘tkazishgan. Yuqori hayot davomiyligi ko‘rsatkichlari bilan mashhur Skandinaviya faol mamlakatlar reytingning birinchi o‘rnini zabt etdi. Ma'lum bo‘lishicha, Shvetsiyada yashovchi o‘n nafar katta yoshli kishidan to‘qqiztasi sport zaliga qatnaydi va har haftada o‘z faolligini saqlab qoladi. Eng faol mamlakatlar reytingida Shvetsiyadan keyingi o‘rinlarni Daniya va Finlyandiya egallagan, bu ikki mamlakatning velosiped sportiga mehri bo‘lakcha. Bu mamlakatlar aholisining 14-15 foizigina jismoniy nofaol.
Germaniya reytingning yettinchi o‘rnini egallagan - bu yerda 10 kishidan 3 nafari jismoniy mashqlarni bajarmasligini ma'lum qilgan. Sayyoraning eng "velosipedchi mamlakati" hisoblanuvchi Fransiya 17-o‘rinda qayd etilgan (fransuzlarning 42 foizi sportdan o‘zini olib qochadi), pitssasevar italyanlar esa oxiridan beshinchi o‘rinni egallashgan - Italiyada aholining 60 foizi sport bilan shug‘ullanmaydi. Shuningdek jismoniy faollikdan yiroq eng dangasa mamlakatlar qatorida Malta, Portugaliya va Ruminiya nomlari keltirilgan.
Tadqiqot ma'lumotlariga ko‘ra, erkaklar ayollarga qaraganda 8 foizga ko‘proq jismoniy mashqlar bajarishar ekan.
