“Asian FIGHT-2017” turniri tashkilotchilari “ajoyib” shou tashkil etilishiga va'da berishdi

O‘zbekiston Penchak-Silat federatsiyasi va qator hamkor tashkilotlar ko‘magida 9 sentabr kuni Toshkentning “Bunyodkor” stadionida Mikst-silat bo‘yicha “Asian FIGHT-2017” xalqaro turniri bo‘lib o‘tishi haqida avval xabar berilgan edi. 

Shu munosabat bilan Alisher Navoiy nomidagi milliy kutubxonada tashkilotchilar va turnirda ishtirok etuvchi sport ustalari ishtirokida OAV vakillari uchun matbuot anjumani bo‘lib o‘tdi. Bu haqda KUN.UZ muxbiri xabar qildi.

Ma'lum qilinishicha, xalqaro turnirda 9 nafar o‘zbekistonlik aralash janglar ustalari 9 sentabrda 8 mamlakatdan kelgan 9 nafar jangchiga qarshi kuch sinashadi. Bahslar 6 burchakli ringda bo‘lib o‘tadi. Unda 57 kgdan +115 kg vazn toifasidagi sportchilar ringga ko‘tarilishadi. 

Musobaqa mavqeini ko‘tarish, mazkur sport turini o‘zbekistonda ham rivojlantirish va dunyo sport muxlislarining diqqatini O‘zbekistonga qaratish maqsadida jahon kinosi yulduzi va jang san'ati ustasi Jan Klod Van Damm, sport ustasi Jyef Monson va boshqalar taklif etilgan. Ushbu mehmonlar ishtirokida alohida dasturlar va mahorat darslari o‘tkazilishi rejalashtirilgan. Shu bilan birga, jahonning turli nufuzli yakkakurash federatsiyalarining yuqori rahbariyatlari vakillari ham faxriy mehmonlar safidan joy oladi.

Bundan tashqari, tashkilotchilar ajoyib sport va shou kechasi bo‘lishiga va'da berishar ekan, O‘zbekiston, Rossiya, Qozog‘iston va Tojikiston estrada guruhlari tomoshabinlar oldida chiqish qilishlarini ham ma'lum qilishdi.