Milliy xavfsizlik xizmati katta miqdordagi qoradori kontrabandasi oldini oldi

Ayni paytda O‘zbekiston Respublikasi huquq-tartibot organlari tomonidan narkotik moddalar tarqatilishining oldini olish, qo‘shni davlatlardan bunday «og‘u»larning kirib kelish yo‘llariga to‘g‘anoq bo‘lish borasida faol ishlar olib borilmoqda.

Bu ishda ayniqsa yil boshidan buyon bir necha narkoguruhlarni fosh etgan milliy xavfsizlik xizmatining alohida o‘rni bor.

Xususan, yaqinda narkotik moddalar bilan bog‘liq jinoyatlari uchun muqaddam sudlangan, biroq o‘zining jinoiy o‘tmishidan to‘g‘ri xulosa chiqarmagan Farg‘ona viloyati Bog‘dod tumanida istiqomat qiluvchi 31 yoshli Avazjon Meliyevni qo‘lga tushirish bo‘yicha maxsus operatsiya muvaffaqiyatli yakun topdi. Olingan ma'lumotlarga ko‘ra, A.Meliyev yo‘lovchi mashinada Toshkent viloyatining Bekobod tumanidan poytaxtga qarab yo‘l oladi. Uning yonidagi sumka ko‘zdan kechirilganida, 3,5 kg og‘irlikdagi qoradori topiladi.

Surishtiruv chora-tadbirlari natijasida aniqlandiki, A.Meliyev ushbu yukni Toshkentgacha olib kelib, keyinchalik sotish uchun Qo‘qon shahriga yetkazmoqchi bo‘lgan.

Bundan tashqari, A.Meliyev Toshkent viloyatining Bo‘ka tumanida narkotik moddalar yashirib qo‘yilgan yashirin joyi borligini ma'lum qilgan. Tekshirish natijasida aytilgan joydan yana narkotik modda — 2,8 kg.dan ortiq vazndagi qoradori topilgan.

Shunday qilib, MXX xodimlari tomonidan maxsus operatsiya mobaynida olingan narkotik moddalarning umumiy hajmi 6,3 kg.dan oshiqroqni tashkil etdi.

Yig‘ilgan materiallar asosida, MXXning Farg‘ona viloyat bo‘limi tomonidan Avazjon Meliyevga O‘zbekiston Respublikasi Jinoyat kodeksining 246- va 273-moddalariga ko‘ra jinoiy ish qo‘zg‘atilgan.