Muammo yechimi: Marg‘ilondagi devor nihoyat buzildi

Kun.uz sayti orqali shu yilning 22 aprel kunida «Marg‘ilonda aholini qiynagan bir devor voqeasi» sarlavhali maqola nashr etilgan edi.

Maqolada Marg‘ilon shahridagi Al-Farg‘oniy ko‘chasida istiqomat qiluvchi Abdulqosim Hasanov noqonuniy tarzda ikki ko‘cha o‘rtasiga devor qurgani va bu devor mahallada yashovchilar keyingi ko‘chaga o‘tishi uchun to‘sqinlik qilayotgani aytib o‘tilgan edi. Bu masalada mahalla fuqarolari O‘zbekiston Respublikasi Prezidentining Marg‘ilon shahar xalq qabulxonasiga murojat qilgan. Muammolar yuzasidan shahar hokimligi, shahar prokurori, Marg‘ilon shahar tumanlararo sudi sudyasi hamda shahar arxitektura va qurilish boshqarmasi boshlig‘i fuqarolarning muammolarini tinglashdi. Manzilning o‘zida muammoga yechim izlandi. Shahar hokimligining arizasiga ko‘ra, mazkur ish Marg‘ilon tumanlararo sudida ko‘rib chiqildi va devor chindan ham noqonuniy tarzda qurilgani aniqlandi.

Marg‘ilon shahri, Al-Farg‘oniy ko‘chasida qurilgan noqonuniy devor buzilishi haqida tumanlararo sudining hukmi amalda qo‘llana boshlandi. Respublika bosh prokuraturasi huzuridagi Majburiy ijro byurosi hamda shahar arxitektura va qurilish boshqarmasi xodimlari tomonidan mazkur devor buzib tashlandi. Mahalla ahli keyingi ko‘chaga bemalol o‘tishi uchun yo‘l ochildi.

«Keyingi ko‘chadagi qo‘shnilarning oldiga o‘tish uchun aylanma yo‘l bilan ikki kilometrlik masofani bosib o‘tishimizga to‘g‘ri kelardi. Ana endi bemalol yuz metr yo‘lni bosib qadrdon qo‘shnilar bilan ko‘rishishimiz mumkin. Aylanma yo‘l ham yo‘q. To‘g‘ri, devor buzilishini juda uzoq kutdik. Lekin buzildi. Shuning o‘zi bizni xursand qiladi», - deydi ko‘chada istiqomat qiluvchi Shuhratjon Xo‘jamberdiyev. 

Mazkur devor buzilishida, fuqarolarga qulay sharoit yaratilishida O‘zbekiston Respublikasi Prezidentining Marg‘ilon shahar xalq qabulxonasining o‘rni alohida deb ayta olamiz. Sababi, murojaat yuzasidan har bir mutasaddi qabulxonaga jalb etilib, daxldor idora va tashkilotlar muammoning yechimini topishda bor kuch-g‘ayratlarini ishga solishdi. Muammo yechim topdi. Mahallaning mushkuli oson bo‘lganidan xursandmiz. Jurnalist mavzuni ko‘tardi, yechim bo‘y ko‘rsatdi.

Ahror Ziyo, Farg‘ona