Atamboyev: "Radikallashuv ko‘p yillar korruptsion va avtoritar rejim hukmron bo‘lgan joyda ildiz otadi"

"Radikallashuv eng avvalo elita va hukumat almashinuvining shaffof mexanizmi mavjud bo‘lmagan, ko‘p yillar korruptsion va avtoritar rejimlar hukmronlik qilgan joylarda ildiz otadi", - dedi Qirg‘iziston prezidenti Almazbek Atamboyev Bishkekda bo‘lib o‘tayotgan "Islom zamonaviy dunyoviy davlatda" nomli xalqaro konferensiyada. 

Uning so‘zlariga ko‘ra, haqiqiy islom jamiyatda tinchlik va osoyishtalik hukm surishi tarafdori, u umuminsoniy qadriyatlar va bag‘rikenglik asosida kishilarni birlashtiradi. Ommaviy axborot vositalari islomning asl mohiyatini buzib, uni tahdid sifatida ko‘rsatmoqda. 

"Bugungi muammolar va shafqatsiz nizolarning sababi islom emas, geosiyosiy o‘yinlar, ijtimoiy adolatsizlik va ko‘p holatlarda islom bilan niqoblangan ekstremistlardir", - dedi Almazbek Atamboyev.

Qirg‘iziston prezidentining ta'kidlashicha, "bizning vazifamiz — haddan oshishdan saqlanish". 

"Islom bilan spekulyatsiya qiluvchi provakatorlarga qarshi turishga tayyor turish kerak. Biroq bunda "aqlli" va samarali uslublarni izlash zarur", - dedi Atamboyev. 

"To‘siqlar va ziddiyatlarni bartaraf qilish yo‘li bilan vasvasadan qochish kerak. Bu vasvasa ko‘pincha davlat xizmatchilarida ham, diniy arboblarda ham kuzatiladi", - dedi u. 

Qirg‘iziston prezidentining so‘zlariga ko‘ra, mamlakat aholisining 90 foizi o‘zini musulmon deb hisoblaydi, mamlakat uchun davlat va diniy jamiyatlar vakillari o‘rtasidagi munosabatlarni hal qilish juda muhim.

"Biz muloqotni davom etirish uchun Bishkekda doimiy xalqaro maydonni yaratish, bu yerda tajriba almashish va davlat va din, radikalizm va ekstremizm masalalarini muhokama qilishni taklif qilamiz", - dedi Almazbek Atamboyev.