Foto: Ulyukayev ishi bo‘yicha sudda 2 mln. dollar solingan quti

Rossiya Iqtisodiy rivojlanish vazirligi sobiq rahbari Aleksey Ulyukayevning ishini ko‘rib chiqayotgan Zamoskvoretskiy sudiga 2 million dollarni olib kelishdi. «Vedomosti» hamda RBK ma'lumotlariga ko‘ra, ichida pullar bo‘lgan va skotch bilan yopib qo‘yilgan qutini qora palto kiyib olgan tergovchi Aleksandr Shevchenko olib kirgan.

Qutida «Alohida muhim ishlarni tergov qilish bo‘yicha Bosh boshqarma» muhrlarini ko‘rish mumkin. Iqtisodiy rivojlanish vazirligi sobiq rahbari jurnalistlardan pullar bilan to‘la qutiga «teginmaslik»ni so‘radi. RBK’ning aniqlik kiritishicha, shundan so‘ng quti ustiga xira paket tashlangan va muhrlar ko‘rinmasligi uchun uni yon tomonga o‘girib qo‘yishgan.

Eslatib o‘tamiz, Ulyukayev «Rosneft» rahbari Igor Sechindan 2 million dollar miqdorida pora talab qilishda ayblanmoqda. Vazir va ishbilarmonning o‘zaro suhbatida «kolbasali savatcha» haqida gap borgan, unda esa Federal xavfsizlik xizmati tomonidan maxsus belgilar qo‘yilgan pullar bo‘lgan.