Firibgar jazosini oldi

Xalqimizda “Hayotda eng asosiysi mehnatdir. Hamma kasofatlardan, hamma qiyinchiliklardan faqat bir yo‘l – mehnat bilan qutulish mumkin”, degan gap yuradi. Haqiqatdan ham uning zamirida ulkan ma'no bor. Lekin uni anglagan va qadriga yetgan insongina ketmas davlatga erishadi. Shu bois ham inson hayoti aziz, qanday umrguzaronlik qilish esa har kimning o‘z aql-idrokiga bog‘liq. Ammo nafs qutqusiga uchib, osonlik bilan o‘zgalar hisobiga o‘z hayotini yo‘lga qo‘yishni istovchilar ham oramizda uchrab turibdi.

“Huquq” gazetasining yozishicha, o‘tgan yilning avgust oyida Farrux Erkinov (ism-familiyalar o‘zgartirilgan) amakisi Komiljon Annamurodovdan bir oyda qaytarib berish sharti bilan bir million so‘m qarz so‘raydi. Jiyanini quruq qaytara olmagan Komiljon naqd puli yo‘qligi, agar xohlasa, plastik kartochkasidagi bir necha million so‘m puldan kerakligini ishlatib, qolganini qaytarib olib kelib berishini aytadi. Jiyani rozi bo‘ladi.

Plastik kartochkani olgan F.Erkinov tanishi Bekzod Aliyevga qo‘ng‘iroq qilib, agar plastik kartochkadagi pulni naqdlashtirib beradigan tanishlari bo‘lsa, bir million so‘m qilib berishini iltimos qiladi. Beli og‘rimay pul topishni maqsad qilib yurgan Bekzod uchun ushbu iltimos ayni muddao edi. Ular ma'lum foiz hisobiga bu ishni amalga oshirishga kelishib olishadi. Plastik kartochkaning kodini bilib olgan B.Aliyev uni olib, o‘zining jinoiy sherigi Olim Boboyevga qo‘ng‘iroq qiladi va qarmog‘iga kattagina “baliq” ilinganini aytadi. Ikkovlon K.Annamurodovga tegishli bo‘lgan plastik kartochkadan 86 mln. 918 ming so‘m mablag‘ni yechib olib, o‘z ehtiyojlariga ishlatib yuborishadi. So‘ngra Bekzod “buning “blok”ka tushib qolgan ekan, undan pul yechib bo‘lmadi”, deb tanishi F.Erkinovga plastik kartochkani qaytarib beradi.

Ushbu gapni eshitgan K.Annamurodov darhol tegishli bankka borib, plastik kartochkasini tekshirtirganida, uning ichidagi pullar yechib olingani ma'lum bo‘ladi.

Tekin oshning ta'mi yoqib qolgan B.Aliyev o‘zining firibi bilan yana bir sodda insonni chuv tushirib ketadi. Ma'murjon To‘laganovning fuqaro Akmal Berdiyevdan qarzdorligini bilib qolgan Bekzod bu pullarga ham ega chiqish rejasini tuzib, bozorda savdo qilayotgan M.To‘laganovning oldiga boradi va A.Berdiyev yuborganini aytib, 16 mln. 980 ming so‘m qarzini tezda berishi kerakligini aytadi. Unga ishongan Ma'murjon o‘rtadagi qarzdan uzilish uchun aytilgan miqdordagi pullarni unga berib yuboradi. Lekin qarz egasiga yetib bormay, Bekzodning ehtiyojlari uchun sarflanadi.

Ishtahasi kun sayin ochilib borayotgan B.Aliyev jinoiy ishlarini davom ettirib, “qarmog‘iga” yana bir insonni ilintiradi. U Odiljon Ro‘ziyev bilan tanishib, uning ishonchiga osongina kira oladi. Ya'ni Bekzod undan AQSh dollariga almashtirib berish evaziga 12 mln. so‘m pul oladi. Va'dani uzog‘i bilan bir oyda bajarishga so‘z bergan firibgar nom-nishonsiz g‘oyib bo‘ladi.

“Ko‘za kunda emas, kunida sinadi”, deganlaridek, mo‘may va mehnatsiz pul topishni o‘ziga kasb qilgan B.Aliyev hamda uning sherigi O.Boboyev qilmishlari uchun javob berishdi. Shu yilning may oyida jinoyat ishlari bo‘yicha Mirobod tuman sudi tomonidan sudlanuvchilarga nisbatan tegishli jazo tayinlandi.