«Muzqaymoq yegani boramizmi?»: Rossiyadagi mundial uchun chiptalarni qanday sotib olish mumkin? (Instruktsiya)

16 noyabrdan boshlab, JCh-2018 uchrashuvlari uchun chipta savdosining ilk bosqichi yakuniy pallaga kiradi. Eslatib o‘tamiz, o‘yinlar Rossiyaning qo‘yidagi 11 shahrida, 12 stadionda bo‘lib o‘tadi: Moskva, Sankt-Peterburg, Volgograd, Kaliningrad, Qozon, Nijniy Novgorod, Samara, Saransk, Sochi, Rostov-na-Don va Yekaterinburg.

Avvalo shuni  aytish lozimki, 2018 yilning aprel oylarigacha biletlarni faqat internetda, FIFA sayti orqali sotib olish mumkin.  

16 noyabrdan nima boshlandi?

12 oktabrgacha bo‘lib o‘tgan savdoda faqat qur'a asosida chiptalar taqsimlandi. Qur'a tasodifiy tanlov asosida «baxtli» xaridorlarni belgiladi, tabiiyki, talabgorlarning katta qismi o‘sha bosqichda chipta qo‘lga kirita olishmadi. Chiptalar uchun 3.5 million ariza topshirilgan bo‘lsa, FIFA tomonidan faqat 622 ming kishi tanlandi xolos.

16 noyabr kuni soat 12.00dan boshlab, muxlislar jonli navbat orqali chiptalarni sotib olish imkoniyatiga ega bo‘ldi. Talabgorlarning haddan tashqari ko‘payib ketishi kutilmoqda, shuning uchun imkoni boricha tezroq harakat qilish talab etiladi. Bu bosqich to 28 noyabrgacha davom etishi ko‘zda tutilgan.

Chiptalar narxi qancha va eng arzon chiptani sotib olish mumkinmi?

Hammasi bo‘lib 4 toifadagi chiptalar mavjud. Har doimgidek, maydonga uzoq-yaqin, qulay-noqulayligiga qarab toifalarga ajratilgan. Xaridorga chipta sotib olmasdan oldin stadionlar sxemasi taqdim etiladi. Shuningdek, oldindan FIFA rasmiy saytiga kirib, mana bu yerda sxemalar bilan tanishib chiqish imkoni bor.

Hozirgi bosqichda birinchi, ikkinchi va uchinchi toifadagi chiptalarni sotib olish mumkin xolos. To‘rtinchi, eng arzon chiptalar faqat Rossiya fuqarolari yoki Rossiyada doimiy istiqomat qiladigan shaxslar uchun mo‘ljallangan. Aytish mumkinki, bu toifadagi chiptalar yuqorida tilga olingan, oktabr oyida tugagan bosqichda to‘liq sotilib bo‘lingan.

Muayyan stadion uchun chiptalar to‘plamini sotib olish ham mumkin. Turnir davomida bir shaharda yashab, faqat o‘sha yerdagi o‘yinlarni tomosha qilishni istagan muxlislar uchun bu variant qo‘l keladi.

Shuningdek, ma'lum terma jamoa muxlislari uchun ham qulaylik bor: faqat o‘sha terma jamoasi o‘yinlari uchun uchtadan yettitagacha (musobaqa davomidagi bir jamoa o‘ynashi mumkin bo‘lgan maksimal o‘yinlar soni) chiptalar to‘plamini xarid qilish imkoniyati bor. Agar siz aytaylik, Argentina terma jamoasi o‘yinlari uchun 7 chipta sotib olsangiz-u, jamoa chorak finalda kurashni to‘xtatsa, biletlarga kuyib qolmaysiz. Siz o‘sha chorak final o‘yinida g‘alaba qozongan terma jamoa o‘yinlariga kirishingiz mumkin bo‘ladi.  

Oldindan nima qilish kerak?

1. FIFAning rasmiy saytida o‘z akkauntingizni ochasiz. Buni elektron pochtangiz yoki feysbukdagi profilingiz orqali amalga oshirsa bo‘ladi.

2. Har bir chipta muayyan shaxs uchun beriladi, shuning uchun pasport ma'lumotlari va pochta indekslari to‘g‘ri ko‘rsatilishi kerak. Agar do‘stlaringiz uchun chipta oladigan bo‘lsangiz, ularning ham xuddi shu ma'lumotlarni kiritishingizga to‘g‘ri keladi.

3. Ariza o‘sha ondayoq ko‘rib chiqiladi, shuning uchun kerakli summa sizda tayyor turishi kerak.

4. Oldindan kerakli summani karta yoki bankdagi hisobingizga to‘ldirib qo‘yish kerak.

Juda ko‘p chiptalar sotib olish mumkinmi?

Buyurtmachi bir o‘yin uchun maksimum 4 chipta (bitta o‘ziga, uch do‘stiga) sotib olishi, shuningdek, ko‘pi bilan 7 o‘yinga chipta olishi mumkin. Demak, bir shaxs eng ko‘p 28 chipta sotib olish imkoniyatiga ega bo‘ladi. Bir kunda faqat bir o‘yinga kirish imkoniyati bor. Shuning uchun bir kun uchun bir necha arizalar berish taqiqlanadi.

Buyurtmachi va uning do‘stlari (saytda «mehmon» atamasi qo‘llaniladi) haqidagi ma'lumotlarni keyinchalik ham FIFA saytidagi shaxsiy kabinetdan turib o‘zgartirish imkoni bor. Demak, buyurtmachi o‘z «mehmonlari» uchun atalgan chiptalarni boshqa shaxsga o‘tkaza oladi. Aytaylik, siz buyurtmachisiz va siz avvaldan chipta sotib olgan do‘stlaringizdan biri o‘yinga kirishni rad etdi. O‘sha chiptani siz boshqa do‘stingizga yoki qarindoshingizga o‘tkaza olasiz. Buning uchun shaxsiy kabinet orqali «mehmon»ning ma'lumotlariga o‘zgartirish kiritishingiz kifoya. Faqat buyurtmachi o‘zi uchun atalgan chiptani boshqaning nomiga o‘tkaza olmaydi.

Aniq bir o‘yin uchun chipta sotib olish mumkinmi?

Qaysi jamoa kim bilan o‘ynashi hali ma'lum emas. Qur'a shu yilning 1 dekabr sanasida o‘tkaziladi. Hozircha muxlislar faqat muayyan sanalar va taqvimdan yoki shaharlardan kelib chiqib o‘z rejalarini qurmoqdalar. Aytaylik, 14 iyul kuni Sankt Peterburgda uchinchi o‘rin uchun o‘yin bo‘lib o‘tadi. Final esa, ertasi kuni Moskavadagi «Lujniki» stadionida bo‘lishi aniq. Hali jamoalar aniq bo‘lmagan holatda, o‘yinlarning taqvimi bilan FIFA saytidagi mana bu yerda tanishish mumkin. Yoki misol uchun, maydon egalari Rossiya terma jamoasining guruh o‘yinlari ham hozirdan ma'lum: 14 iyunda «Lujniki»da ochilish o‘yini, 19 iyunda Peterburgda, 25 iyunda esa Samarada turnir mezbonlari o‘z o‘yinlarini o‘tkazadi.

To‘lovlar qanday amalga oshiriladi?

Rossiya fuqarosi faqat VISA va «Mir» kartalari, shuningdek, bankdan pul o‘tkazish yo‘li bilan chipta sotib oladilar. Boshqalar uchun MasterCard kartalari ham ishlaydi. Ariza paytida kartada pul tayyor turishi kerak, chunki ariza qayd etilishi bilan pul yechib olinadi. Bankdagi hisobraqam orqali sotib olishni istaganlar uchun esa, to‘lovni amalga oshirish uchun 7 kun vaqt beriladi.

FIFA qoidalariga ko‘ra, buyurtmachi shaxsiy karta orqali ariza bera oladi xolos. Agar boshqa insonning nomiga ochilgan karta orqali chipta buyurtma qiladigan bo‘lsa, 20 foiz jarima to‘lashga to‘g‘ri keladi.

FAN ID nima degani?

Bu bilet sotib olgan muxlisning o‘ziga xos pasportidir. Chipta sotib olinayotganda bu narsa talab qilinmaydi. Bu xujjat stadionga kirishda chipta bilan birga so‘raladi. Shuningdek, bu hujjat yordamida o‘yin kunlari jamoaviy transportlardan bepul foydalanish mumkin.

Chipta rasmiylashtirishgandan so‘ng buyurtmachi mana bu maxsus sayt ga kirib, ruyxatdan o‘tishi kerak bo‘ladi. FAN ID ni pochta orqali yoki maxsus bo‘linmaga borib olish mumkin. Bo‘linmalar stadionlar joylashgan har bir shaharda bor.  

Bolalar uchun?

Bilish lozimki, yosh bolalar uchun alohida chiptalar mavjud emas. Misol uchun uch yashar bola bilan 30 yoshga kirgan odam uchun bir xil narxlarda chipta olinadi. Yosh bolalar uchun ham, xuddi katta odamlar kabi, alohida joy ajratiladi.  Bolaning tug‘ilganlik guvohnomasi pasport o‘rnida o‘taveradi.

Shaharlararo transportlar bepulmi?

Xuddi Konfederatsiyalar kubogi vaqtida bo‘lganidek, jahon chempionatida ham muxlislarga bepul xizmat ko‘rsatiladi. Buning uchun qo‘shimcha poyezdlar ham ishga tushiriladi. Faqat yo‘lovchi o‘sha borilayotgan shaharda bo‘lib o‘tadigan o‘yin uchun chipta va FAN ID ni ko‘rsashi kerak bo‘ladi. Buning uchun ham alohida mana bu saytga kirib, marshrutni belgilab olish kerak.

Keyinroq ham chipta sotib olish mumkinmi?

Albatta, qur'a tashlanib, yakuniy taqvimlar chiqqanidan keyin ham, keyingi bosqichlarda chipta sotib olish imkoniyati mavjud. Chiptalar qiymati o‘zgarmaydi, faqat, tabiiyki, ozroq bo‘ladi.

5 dekabrdan 31 yanvargacha: Chipta uchun ariza berish mumkin, shundan so‘ng qur'a asosida chipta egalari tanlab olinadi.

13 martdan 3 aprelgacha: Xuddi xozirgidek, jonli navbat tizimi bo‘ladi. Ya'ni avvalgi bosqichlarda sotilmay qolgan chiptalarni ariza orqali, yuqorida tushuntirilgan usulda sotib olish mumkin.

18 apreldan 15 iyungacha: Ana endi, birinchi marta faqat internetda emas, bevosita kassaga borib ham chipta sotib olish mumkin bo‘ladi.

Shuningdek, so‘nggi bosqichlarning birida chiptalarning «qayta sotuvi» ham yo‘lga qo‘yiladi. Avvalgi bosqichlarda chipta olgan, ammo turli sabablarga ko‘ra, ulardan yoki ba'zilaridan foydalana olmaydigan buyurtmachilar FIFA sayti orqali o‘z chiptalarini boshqalarga sota olishadi.