Hasanboy Do‘stmatov o‘z vazniga qaytadimi?

Rossiyaning Beloyarskiy shahrida o‘tayotgan boks bo‘yicha «Neftga ega mamlakatlar kubogi» musobaqasi bo‘lib o‘tdi. O‘zbekistonlik bokschilar mazkur musobaqada muvaffaqiyatli ishtirok etishdi.

Asosiy faoliyati davomida 49 kilogramm vazn toifasida ringga tushib kelayotgan Hasanboy Do‘stmatov turnirda o‘zi uchun nisbatan og‘ir bo‘lgan 52 kilogramm vaznda g‘olib bo‘ldi.

U tashkilotchilar tomonidan «Musobaqaning eng yaxshi bokschisi» deya tan olindi.

Sportchi bilan bog‘lanib, uning keyingi musobaqalarda o‘z vazniga qaytishi yoki faoliyatini o‘z uchun yangi bo‘lgan og‘irlikda davom ettirishi bilan qiziqdik.

«52 kg vaznda ham g‘oliblikni qo‘lga kiritganimdan xursandman. To‘g‘risi, biroz qiyin bo‘lgani rost. Lekin, navbatdagi asosiy musobaqalarda yana o‘zim uchun qadrdon bo‘lgan 49 kilogramm vaznga qaytaman. Endi yurtimizga qaytgach, biroz dam olib, keyingi yilning asosiy turniri - Indoneziyaning Jakarta shahri bo‘lib o‘tadigan XVIII yozgi Osiyo o‘yinlariga tayyorgarlikni boshlaymiz»,- deydi Hasanboy Do‘stmatov KUN.UZ muxbiriga.

Eslatib o‘tamiz, boks bo‘yicha O‘zbekiston terma jamoasi Rossiyaning Beloyarsk shahrida bo‘lib o‘tgan «Neft mamlakatlari kubogi» musobaqasida 1ta oltin, 3 kumush medal bilan 13 mamlakat ichida (130dan ortiq sportchilar) umumjamoa hisobida mezbonlar Rossiya terma jamoasidan (8 oltin, 7 kumush, 13 bronza) so‘ng 2-o‘rinni qo‘lga kiritdi. Qozog‘iston terma jamoasi esa 1 oltin, 1 kumush, 2 bronza medali bilan 3-pog‘onani band etdi.