Туркияда 260 дан ортиқ давлат хизматчиси ишдан ҳайдалди
14:09 / 12.01.2018
3802
Фото: Global Look Press

Туркия ҳукумати қатор вазирлик ва идоралар ҳамда Қуролли кучлар таркибидан 260 дан ортиқ ходимни ишдан бўшатди. Бу ҳақда ҳукумат фармонида айтилади, у жума куни Resmi Gazete расмий нашрида эълон қилинди.

Фармон қонун кучига эга, сабаби республикадаги фавқулодда ҳолат режими шароитида чиқарилди ҳамда ходимларни ишдан бўшатиш учун қўшимча расмиятчиликлар талаб этилмайди: бу шахслар иш ўринларини 15 сутка давомида бўшатиб қўйишлари лозим. Фармонда таъкидланишича, бу "Миллий хавфсизлик кенгаши томонидан давлатга қарши деб топилган террорчилик ташкилотларига ёрдам кўрсатаётган, аъзоликка эга бўлган ёки алоқалари бўлганлар"дир. Давлат телевидениеси, Молия, Таълим, Соғлиқни сақлаш вазирликлари, Давлат почта хизмати, Олий таълим бўйича кенгаш ходимлари, шунингдек 50 га яқин ҳарбий хизматчи ишдан ҳайдалди.

Ҳукумат террорчилар фойдасига ишлаётган ва мамлакатдаги конституциявий тузумга қарши ҳаракат қилаётган деб топилган минтақавий телеканал ҳамда радиостанцияларни ҳам ёпди. Бундан ташқари, фармон билан 1,8 минг киши реабилитация қилинди, улар ФЕТО ташкилоти фаолиятини текширувдан ўтказиш доирасида турли давлат идораларидан бўшатилганди. Уларга ишга жойлашиш учун тегишли идораларнинг кадрлар департаментларига мурожаат этиш учун 10 сутка муддат тақдим этилди.


Улашинг
Top