MXX va prokuraturadagi o‘zgarishlar haqida rasman ma'lumot berildi

O‘zbekiston prezidenti matbuot xizmati Milliy xavfsizlik xizmati va bosh prokuraturadagi lavozimiy o‘zgarishlar bo‘yicha rasman ma'lumot berdi.

Unga ko‘ra, O‘zbekiston Respublikasi Prezidentining 31 yanvardagi PF-5317-son Farmoni bilan O‘zbekiston Respublikasi Konstitutsiyasi 93-moddasining 24-bandiga muvofiq Rustam Rasulevich Inoyatov O‘zbekiston Respublikasi Prezidentining siyosiy-huquqiy masalalar bo‘yicha Davlat maslahatchisi lavozimiga tayinlangan, shu munosabat bilan O‘zbekiston Respublikasi Milliy xavfsizlik xizmati Raisi lavozimidan ozod etilgan.

O‘z navbatida, uning o‘rnini O‘zbekiston Respublikasi Bosh prokurori Ixtiyor Baxtiyorovich Abdullayev egalladi.  Prezidentning PF-5318-son Farmoni bilan O‘zbekiston Respublikasi Konstitutsiyasi 93-moddasining 12 va 24-bandlariga muvofiq Ixtiyor Abdullayev O‘zbekiston Respublikasi Milliy xavfsizlik xizmati Raisi lavozimiga tayinlandi va shu munosabat bilan O‘zbekiston Respublikasi Bosh prokurori lavozimidan ozod etildi.

Shuningdek, O‘zbekiston Respublikasi Prezidentining 31 yanvardagi PF-5320-son Farmoni bilan O‘zbekiston Respublikasi Konstitutsiyasi 93-moddasining 12 bandiga muvofiq Otabek Baxritdinovich Murodov O‘zbekiston Respublikasi Bosh prokurori lavozimiga tayinlandi, shu munosabat bilan O‘zbekiston Respublikasi Prezidentining siyosiy-huquqiy masalalar bo‘yicha Davlat maslahatchisi lavozimidan ozod etildi.