Buryatiyada o‘zbekistonlik ayollarni fabrikada bepul ishlashga majburlagan «quldorlar» sud qilinmoqda

Rossiyaning Buryatiya respublikasida O‘zbekiston va Qirg‘izistondan ayollarni olib kelib, ularni fabrikada bepul ishlashga majbur qilgan shaxslar ustidan sud o‘tkazilmoqda.

Buryatiya prokurori o‘rinbosari Talex Magomedov tomonidan Buryatiyada yashovchi uch shaxs va O‘zbekiston fuqarosi bo‘lgan ayolga nisbatan jinoiy ish yuzasidan ayblov xulosasi tasdiqlandi. Bu haqda Buryatiya prokuraturasi matbuot xizmatidan xabar berishgan.

Ular xorijiy fuqarolarning Rossiya Federatsiyasida noqonuniy tarzda bo‘lishini tashkillashtirish va quldorlikda ayblanmoqda.

Tergovga ko‘ra, 2015 yilda ayblanuvchilar uyushgan jinoiy guruh tarkibida 11 nafar xorijiy fuqaroning Rossiya hududida noqonuniy tarzda bo‘lishini tashkillashtirishgan bo‘lib, ularni Pribaykalsk tumanidagi Turuntayeva qishlog‘i hududida joylashgan ishlab chiqarish bazalarining xo‘jalik binolariga joylashtirishgan.

Ma'lum bo‘lishicha, 2016 yilning martidan iyul oyiga qadar ko‘rsatilgan guruh a'zolari o‘sha binolarda O‘zbekiston va Qirg‘izistonning 16 fuqarosini noqonuniy tarzda ushlab turishgan, ularning shaxsini tasdiqlovchi hujjatlarini olib qo‘yishgan.

"Ruhiy va jismoniy zo‘ravonlik qo‘llangan holda, yo‘l qo‘yilgan xatolar uchun qattiq jazolash tizimi yordamida ularni to‘qimachilik mahsuloti fabrikasida ishlashga majburlashgan. Xorijiy fuqarolar bunday sharoitda ishlarni bajarishdan bosh tortisha olishmagan. Shu bilan birga, ish haqi deyarli to‘lanmagan, odamlar ovqat uchun ishlashgan", - deya ta'kidlab o‘tishgan Buryatiya Respublikasi prokuraturasi matbuot xizmatidan.

Jinoiy ish materiallari Pribaykalsk tumani sudiga yuboriladi.