«Real» Neymarga taklif yubordi

«Real» «PSJ» hujumchisi Neymarni sotib olish uchun harakatlarni boshladi.

UOL Esporte tarqatgan xabarga ko‘ra, Madrid klubi 26 yoshli futbolchiga taklif bayon etilgan maktub yo‘llagan.

Xabarda aytilishicha, Braziliyaga agent Pini Zaxavi uchib borgan, u Neymar bilan uchrashib, taklifning detallarini tushuntirgan. Uning aytishicha, «Real» prezidenti Florentino Peres ushbu transferga jiddiy kirishgan.

O‘z navbatida Neymar ham Madrid klubiga shartlarini bildirgan.

Ma'lumot uchun, Zaxavi Neymarning oilasi bilan anchadan buyon yaqindan tanish hisoblanadi, u Neymarning otasi bilan yaqin aloqalarda.

Bundan avvalroq futbolchi «PSJ»dan haftasiga 1,1 mln yevro miqdoridagi maosh olsagina, Parijda qolishini bildirgani haqida xabarlar tarqalgandi.

Eslatib o‘tamiz, Neymar 2017 yilning avgustida 222 million yevro evaziga «Barselona»dan «PSJ»ga kelib qo‘shilgandi. U joriy mavsumda yangi jamoasi safida 30 uchrashuvda maydonga tushdi va 29 gol urib, 19 golga uzatma berdi.