Qatar Saudiya Arabistonining Dahron shahrida 15 aprelda o‘tadigan Arab davlatlari ligasi sammitida ishtirok etadi. Doha News yangiliklar portalining ma'lum qilishicha, bu haqda Qatar tashqi ishlar vazirligining vakili Lulva al-Xatar ma'lum qilgan.
Uning aytishicha, Doha taklifni qabul qilgan, biroq sammitda amirlikning qaysi darajadagi mansabdor shaxslari ishtirok etishi bo‘yicha qaror qabul qilinmagan. Sammitda Falastin-Isroil ixtilofi; Al-Quds maqomi masalasi; Suriya, Yaman, Liviyadagi inqirozlar; terrorchilikka qarshi kurash hamda Eronning arab davlatlari ishiga aralashuvi ko‘rib chiqiladi. Shuningdek, Qatar va arab davlatlari o‘rtasida vujudga kelgan inqiroz muhokama qilinadi.
