Isroil 2017 yil davomida 9,2 milliard dollarlik qurol-yarog‘ sotdi, bu 2016 yilga nisbatan 40 foizga ko‘p. Bu haqda ushbu davlatning Mudofaa vazirligi matbuot xizmati tomonidan e'lon qilingan bayonotda aytiladi.
"2017 yilda eksportga mo‘ljallangan yangi shartnomalarning umumiy miqdori 9,2 milliard dollarga teng bo‘ldi, bu 2016 yilga nisbatan 40 foizga ko‘pdir, - deyiladi hujjatda. - O‘tgan yil mobaynida Isroil mudofaa konsernlari CIBAT (Mudofaa vazirligining eksport va harbiy-texnik hamkorlik bo‘yicha boshqarmasi) yordamida Isroilning xalqaro mudofaa bozoridagi pozitsiyalarining kuchayishiga olib kelgan o‘nlab yirik shartnomalarni imzoladi”.
Vazirlikdan ko‘rsatishlaricha, 2017 yilda Isroil harbiy eksportining asosiy sohalariga "raketasozlik va havo hujumidan mudofaa tizimlari (31%), radarlar va radioelektron kurash (17%), modernizatsiya va avionika (14%), o‘q-dorilar va qurol qurilmalari (9%), telekommunikatsiya tizimlari hamda aloqa tizimlari (9%), kuzatuv va optronika (8%), ma'lumotlar razvedkasi tizimi, axborot tizimlari va kibertexnologiyalar (5%), xizmatlar va boshqalar (3%), dronlar (2%), dengiz tizimlari (1%), sun'iy yo‘ldoshlar hamda koinot (1%)" aylangan.
Mudofaa vazirligidan qo‘shimcha qilishlaricha, 2017 yilda Isroil mudofaa eksportining 58% Osiyo-Tinch okeani mintaqasi davlatlariga, 21% - Yevropa mamlakatlariga, 14% - Shimoliy Amerikaga, 5% - Afrikaga va 2% - Lotin Amerikasiga yo‘naltirilgan.
