AQSh G‘azo sektorida odamlar halok bo‘lishi uchun javobgarlikni XAMAS zimmasiga yukladi  

AQSh G‘azo sektori chegarasidagi to‘qnashuvlarda ko‘plab odamlarning halok bo‘lgani uchun javobgarlikni XAMAS harakati zimmasiga yukladi. Oq uyning ta'kidlashicha, XAMAS Isroil davlatini javob harakatlar sodir etishga majbur qilmoqda. Bu haqda Oq uy matbuot kotibining birinchi o‘rinbosari Raj Shax jurnalistlar bilan brifingda aytib o‘tdi.  

“Biz G‘azoda zo‘ravonlik davom etayotganidan xabardormiz. Bu fojiali o‘limlar uchun javobgarlik to‘liq XAMAS zimmasidadir. XAMAS ataylab va orsizlarcha Isroilni javob harakatlari sodir etishga undamoqda. Isroil o‘zini himoya qilishga haqli”, deb aytgan Shax.

Shaxning aytishicha, XAMAS “yuzaga kelgan vaziyatdan orsizlarcha foydalanmoqda”, AQSh esa XAMAS to‘xtashini istamoqda.

AQSh elchixonasining Al-Qudsga ko‘chirilishi sababli G‘azoda martdan beri davom etib kelayotgan noroziliklar yangi kuch bilan avj oldi. Isroillik askarlar namoyishchilarga qarshi jangovar o‘qlar qo‘llagan. Ma'lum qilinishicha, buning oqibatida 52 kishi halok bo‘lgan, 2,4 mingdan ko‘proq odam yaralangan.