2018/19 o‘quv yilidan boshlab O‘zbekistondagi barcha umumta'lim maktablarida avtonom «axborot qutisi» paydo bo‘ladi. Soddaroq qilib aytganda, maktablar uchun foydali resurslarga ega bo‘lgan lokal internet shakllantiriladi. Bu haqda Kun.uz muxbiri Innovatsion rivojlanish vazirligi boshqarmasi boshlig‘i Behzod Hamzayevga tayanib xabar bermoqda.
Ma'lum qilinishicha, har bitta maktabga QBox qurilmasi o‘rnatilishi nazarda tutilgan, shuningdek, u axborot bilan to‘ldiriladi. Qurilmaga chegaralangan maydon radiusi ichida bo‘lgan foydalanuvchilar ulana oladi.
«300 nafar foydalanuvchi bir vaqtning o‘zida qurilmaga ulanish imkoniyati mavjud hamda 10 terabayt qattiq xotiraga joylashtirilgan ma'lumotlardan bemalol foydalanishi mumkin. Texnik jihatdan QBox qurilmasidagi axborotlar har oyda bir marta yangilanadi.
Qattiq xotirada o‘qituvchi va o‘quvchilar uchun kerakli, eng asosiysi foydali ma'lumotlar bo‘lishi ta'minlanadi. Masalan, video darsliklar, kitob va qo‘llanmalarning elektron nusxasi, seminar, trening va darslar uchun ko‘rgazmali qurollar shular jumlasidan. Qurilmani amaliyotga tatbiq etishimiz bilan yana bir masalada ishlar yengillashadi: o‘quvchi 1 sinfdan to 11 sinfga qadar kitob qidirib ovora bo‘lmaydi. Endilikda barchasi real rejimda amalga oshiriladi - o‘quvchi kitoblarni QBox orqali ko‘chirib olishi mumkin», deydi Innovatsion rivojlanish vazirligi Davlat va jamiyatga innovatsiyalarni joriy etish boshqarmasi boshlig‘i Behzod Hamzayev.
Dastlabki bosqichda Surxondaryo viloyatining 100ta maktabida qurilma sinovdan o‘tkaziladi. Keyinroq, qurilma o‘zini oqlasa, 3 oy o‘tib, Surxondaryo viloyatining 855ta maktabida QBox o‘rnatiladi. So‘nggi bosqichda qurilma respublikaning barcha maktablarida o‘rnatilishi rejalashtirilmoqda.
Ma'lumot uchun,Quantum Box qurilmalari Gongkongda ishlab chiqariladi, AQShning Unify kompaniyasi esa qurilma uchun maxsus dastur tayyorlagan. QBox qurilmalarini foydalanishga topshirish, platformalarni sozlash ishlari bilan O‘zbekiston Axborot va kommunikatsiyalarini rivojlantirish vazirligi shug‘ullanadi.
