Qashqadaryolik aldangan ayol IIV yordamida Turkiyadan olib kelindi

O‘zbekiston Respublikasi IIV Terrorizm va ekstremizmga qarshi kurashish bosh boshqarmasining Odam savdosiga va noqonuniy migratsiyaga qarshi kurashish boshqarmasi bergan ma'lumotga ko‘ra, joriy yilning 7 iyun kuni Toshkent xalqaro aeroportida Qashqadaryo viloyatining Shahrisabz tumanida yashovchi ayol yaqinlari tomonidan kutib olingan. 

U shu yilning 28 aprel kuni hozirda huquqni muhofaza qiluvchi idoralar tomonidan shaxsi aniqlanayotgan Charos ismli tanishining Turkiya davlatida enagalik qilish va buning evaziga katta miqdorda oylik maosh olish to‘g‘risidagi yolg‘on va'dasiga ishonib, Turkiya davlatining Istanbul shahriga ketgan, deb xabar bermoqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi.

Istanbulda uni Charosning singlisi Yulduz ismli ayol kutib olganligini va Komilbey ismli turk fuqarosiga olib borib, hujjatlari bilan birga topshirib yuborganini ma'lum qilgan. Natijada uni og‘ir sharoitga solib, hujjatlarini olib qo‘yib, majburiy mehnatga jalb qilganlar. Bunday sharoitlarga chiday olmagan va aldanganligini payqagan ayol u yerdan qochib, ko‘chada qolib ketadi.

Ayolning holati yuzasidan olingan ma'lumot asosida, O‘zbekiston Respublikasi Ichki ishlar vazirligi Tashqi ishlar vazirligi bilan hamkorlikda olib borgan ishlari natijasida jabrlangan ayol O‘zbekistonga qaytarildi.