Yaponiya qiruvchilari yo‘lovchi samolyoti bilan to‘qnashib ketishiga bir baxya qoldi

Yaponiya harbiy-havo kuchlarining ikkita F15 qiruvchisi qo‘nishga chog‘lanayotgan yo‘lovchi samolyoti bilan to‘qnashib ketishiga bir baxya qoldi. Bu haqda «Kiodo» agentligi xabar bermoqda.

Hodisa 16 iyun kuni Okinava orolidagi Naxa shahri aeroportida yuz bergan. Birinchi qiruvchi uchuvchisi uchish-qo‘nish yo‘lagiga qarab harakatlanishni taqiqlagan dispetcher ovozini eshitmagan. F-15 yo‘lakka chiqqanida esa, 300 metrlik balandlikda parvoz qilayotgan yo‘lovchi samolyoti qo‘nishga chog‘lanayotgan edi.

Shunda dispetcher fuqarolik layneri uchuvchilariga qo‘nishni taqiqlaydi. Oradan bir qancha vaqt o‘tib, har ikki qiruvchi parvoz qildi, hamda yo‘lovchi samolyoti muvaffaqiyatli ravishda qo‘ngan.

Agentlik ma'lumotlariga ko‘ra, Transportdagi xavfsizlik bo‘yicha milliy qo‘mita voqea yuzasidan surishtiruv ishlarini boshlagan.