“O‘zagrokimyohimoya” ishlarni kuchaytirmoqda: o‘simliklarni kasalliklardan himoya qilish yanada oshiriladi

Ma'lumki, bugungi kunda serquyosh O‘zbekiston zaminida yetishtirilgan mahsulotlar nafaqat ichki, balki tashqi bozorlarda ham juda xaridorgirdir. Bunga ularning tabiiyligi, turli kasalliklardan xoli ekani ham ta'sir ko‘rsatmoqda. Istalgan iste'molchi faqat eng sifatli mahsulotlarni xarid qilishni xohlaydi. Bunda esa shu mahsulotning yetishtirilish jarayoni ham muhim o‘rin tutadi.

“O‘zagrokimyohimoya” AJ boshqaruvida “Qishloq xo‘jaligi mahsulotlari yetishtirishda ilg‘or tajribalarni qo‘llash hamda ko‘rsatilayotgan servis xizmatlar turi va hajmini ko‘paytirish bo‘yicha hamkorlikda amalga oshiriladigan chora-tadbirlar” mavzusida o‘tkazilgan seminar ham bevosita yuqoridagi masalalarni o‘z ichiga qamrab oldi.

Ya'ni, seminar davlat korxonalari va tadbirkorlar o‘rtasida manfaatli hamkorlikni yo‘lga qo‘yish, o‘simliklarning zararkunandalari, kasalliklari hamda begona o‘tlarga qarshi kurash, o‘simliklarni bargidan oziqlantirish (suspenziya) tadbirlarida ilg‘or chet el davlatlari tajribalarini tadbiq qilish, tomorqa yer egalari, meva-sabzavot, poliz mahsulotlari yetishtiruvchi fermer va dehqon xo‘jaliklariga malakali mutaxassislar tomonidan konsalting va agrokimyoviy xizmatlar ko‘rsatishni kengaytirish, sifatli, inson sog‘ligi uchun zararsiz va eksportbop qishloq xo‘jaligi mahsulotlari yetishtirish uchun barcha imkoniyatlardan foydalanish kabi maqsadlarga ega bo‘ldi.

Seminar yakunida “O‘zagrokimyohimoya” aksiyadorlik jamiyati hamda kimyoviy vositalar ishlab chiqaruvchi va yetkazib beruvchi tashkilotlar o‘rtasida “Hamkorlik to‘g‘risida memorandum” imzolandi.

Shuni alohida ta'kidlab o‘tish lozimki, bugungi kunda Qoraqalpog‘iston Respublikasi va viloyat “Agrokimyohimoya“ aksiyadorlik jamiyatlari tomonidan nafaqat g‘alla va paxta maydonlariga agrokimyoviy xizmatlar ko‘rsatish, balki qishloq xo‘jaligi mahsulotlarini yetishtiruvchi fermer, dehqon xo‘jaliklari hamda shaxsiy tomorqa yer egalariga ham xizmat ko‘rsatishni tashkillashtirish ishlari olib borilmoqda. Joylarda “A'lo xizmat“ deb nomlangan servis otryadlari tizimi bosqichma-bosqichyo‘lga qo‘yilmoqda.

Bugungi kunda respublika bo‘yicha 152 ta servis otryadlari tashkil etilib, faoliyati yo‘lga qo‘yildi.

“O‘zagrokimyohimoya” qishloq xo‘jaligi mahsulotlariga kasallik tushishining oldini olish, profilaktika qilishni maqsad qilgan. Profilaktikaga katta e'tibor qaratilsa, u arzon bo‘ladi, sababi kasallik tushgandan keyingi xarajatlarni qisqartirish imkonini beradi. Bunda qishloq xo‘jaligi mahsulotiga birinchi o‘rinda sifat jihatidan e'tibor qaratiladi. Shuningdek, u o‘z muddatida iste'molchilarga yetkazib berilishi, hosili yaxshi bo‘lishi ham muhim o‘rin tutadi.

Qayd etilishicha, aynan shu narsa prezident topshirig‘ida ham ko‘rsatib o‘tilgan. Endi korxona hududlarda ham davlat-xususiy sherikchilik tamoyili asosida punktlar tashkil qiladi. Niyat - qishloqlarning ichlarigacha kirib borish, bunga tadbirkorlarni jalb qilib, punktlar joriy qilish yo‘li bilan erishilmoqchi.

Reklama huquqi asosida