O‘zbekistonda qishloq xo‘jaligi zararkunandalariga qarshi «O‘zagrokimyohimoya» kurashadi

O‘zbekiston qishloq xo‘jaligi sohasida faoliyat yurituvchi dehqon-fermer xo‘jaliklariga sifatli agrokimyoviy xizmatni ko‘rsatish hosildorlik va dehqonlar va fermerlarning daromad ko‘rishida muhim o‘rin tutadi. 

Xo‘sh, bu borada O‘zbekistonda qanday ishlar amaliyotga oshirilmoqda? Dehqon-fermerlarga qanday servis xizmatlar ko‘rsatilmoqda? “O‘zagrokimyohimoya” AJ tizimidagi Qoraqalpog‘iston Respublikasi va viloyatlar «Agrokimyohimoya» tashkilotlari tomonidan fermer-dehqon xo‘jaliklari hamda shahsiy tomorqa yer egalariga ko‘rsatilayotgan servis xizmatlari sifati va samaradorligini oshirishda qanday faoliyat ko‘rsatmoqda? Milliy matbuot markazida tashkil etilgan matbuot anjumani shu haqda bo‘ldi, deb xabar qilmoqda Kun.uz muxbiri.

Dastavval «O‘zagrokimyohimoya» AJ tizimidagi tashkilotlar, ular zimmasiga yuklatilgan vazifalar, dehqon-fermer xo‘jaliklari va shaxsiy tomorqa egalariga ko‘rsatilayotgan agrokimyoviy xizmatlar hamda erishilgan yutuqlar to‘g‘risida batafsil ma'lumot berildi.

Unga ko‘ra, g‘alla va paxta maydonlarida kuzatuv-nazorat ishlarini amalga oshirish uchun 1042 nafar agronom-entomologlar faoliyat ko‘rsatmoqda. Joriy yilning yanvar-may oylari davomida 2019 yil hosili uchun g‘alla va paxta ekinlari uchun sof hoda 278,0 ming tonna azotli, 76,0 ming tonna fosforli va 11,5 ming tonna kaliyli mineral o‘g‘itlar yetkazib berildi.

«Boshoqli don ekin maydonlarida bir yillik ikki pallali begona o‘tlarga qarshi 1044,0 ming gektarda, boshoqli begona o‘tlarga qarshi 591,0 ming gektarda gerbitsidlar, zang va boshqa kasalliklarini rivojlanishini va tarqalishini oldini olish uchun asosan profilaktika maqsadida 2 million 226 ming gektarda (takroriy ishlovlar bilan) fungitsid preparatlari, zararkunandalarga qarshi profilaktika maqsadida 950 ming gektarda biologik usulda va 1180,0 ming gektarda insektitsidlar bilan kimyoviy usulda ishlovlar o‘tkazildi», - deya ma'lum qildi AJ boshqaruvi raisi birinchi o‘rinbosari Xo‘jambergen Bekbergenov.

Uning aytishicha, g‘o‘za maydonlarida shira-tripslarga qarshi 1152 ming gektarda biologik va 63,0 ming gektarda kimyoviy ishlovlar o‘tkazildi. O‘rgimchakkanaga qarshi 35,0 ming gektarda biologik, 206,0 ming gektarda ISO qaynatmasi bilan ishlovlar o‘tkazildi. Tunlam qurtlariga qarshi 766,0 ming gektarda biologik va 9,5 ming gektarda kimyoviy ishlovlar amalga oshirilgan. 

Shuningdek, joriy  yilda mevali bog‘larda  142 ming gektar va tokzorlarda 75 ming gektarda  fungitsidlar yordamida proflaktik kimyoviy  ishlovlar o‘tkazildi. 
Bugungi kunda mevali bog‘larning zarakunandalariga qarshi kimyoviy  90,0 ming gektar, biologik 11,5 ming gektar hamda kasalliklarga qarshi 80,0 ming gektar,  shuningdek tokzorlarda 36,0 ming gektar, kartoshkada 17,3 ming gektar, poliz ekinlarida 11,0 ming gektar,  sabzavotda 45,0 ming gektar  hamda begona o‘tlarga qarshi 40,0 ming gektar maydonda kimyoviy ishlovlar o‘tkazilib, kuzatuv va dala nazorat ishlari olib borilmoqda.