«O‘zbekiston temir yo‘llari» daromadi ikki barobarga oshdi

2018 yil birinchi choragida «O‘zbekiston temir yo‘llari» aksiyadorlik jamiyatining daromadi 2 trillion so‘mni tashkil etdi, bu o‘tgan yilning shu davriga nisbatan ikki barobar ko‘pdir. Bundan kompaniya saytida e'lon qilingan statistika ma'lumotlari darak beryapti.

2018 yilning birinchi uch oyi davomida yuk aylanmasi 5,38 milliard tonna-km.ni tashkil qildi, o‘tgan yil bilan taqqoslaganda u 2,2 foizga kamaydi. Olib o‘tilgan barcha turdagi yuklar hajmi 24 million tonnadan oshdi.

Yo‘lovchi aylanmasi 3,8%ga o‘sdi va bir milliarddan ziyod yo‘lovchi-km.ni tashkil etdi. Kompaniya birinchi chorakda jami 5,1 million yo‘lovchini o‘z manziliga yetkazdi. Bu ko‘rsatkich o‘tgan yilga nisbatan 11,8 foizga oshdi.

2018 yilda aksiyadorlik jamiyati umumiy qiymati 672 million AQSh dollariga teng 15 ta investitsiya va infratuzilma loyihasini amalga oshiradi. Xususan, joriy yilda 29 ta lokomotiv, 1,5 ming yuk vagonini ta'mirlash va tiklash, minglab yuk va 15 ta yo‘lovchi vagonlarini qurish, shuningdek, 180 km temir yo‘llar reabilitatsiyasi rejalashtirilgan.