Shifokorlar ozishni tavsiya qilishdi – bemorda esa 20 kg.lik kista aniqlandi

Kayla Rahn homilador emas edi. Hatto farzandi ham yo‘q edi. Shifokorlar esa, vazn tashlashni tavsiya qilishdi. Aslida muammo uzoq vaqt aniqlanmagan tuxumdon kistasi bo‘lib chiqdi. 

AQShning Alabama shtatilik Kayla Rahn 2017 yil yozida kutilmaganda, taomnomasida jiddiy o‘zgarishlar bo‘lmasa-da, vazn to‘play boshladi. Dastavval u o‘tirib ishlash tufayli shunday bo‘lmoqda, deb o‘ylagan. Ammo, vaqt o‘tishi bilan bir vaqtlar osongina qila oladigan ishlar ham qiyinlashdi. U kuzga kelib, qorin sohasidagi og‘riqdan shikoyat qila boshladi. 

Shifokorlar esa, u shunchaki vazn tashlashi lozimligini aytishdi. Rahn sog‘lom taomlarni tanovul qilib, fitnes zallariga borganiga qaramay, vazni kamaymadi. Uning aytishicha, Rahn 4 nafar shifokorga uchrashgan, ularning hech biri tuxumdonidagi o‘simtani aniqlay olmagan. 

Montgomery's Jackson Hospital shifoxonasi shifokori Dr.Gregory Jones buni anglashilmovchilik sifatida baholamoqda.

"Albatta, takroriy tekshiruvlar chog‘ida ham bu narsaning aniqlanmagani xatodir. Biz barchamiz vaqti-vaqti bilan shunday anglashilmovchilikka duch kelib turamiz. Axir biz ham insonmiz. Shunga qaramay, biz bemorlarni davolashuchun qattiq ter to‘kamiz", - degan Dr.Gregory Jones.

Kayla Rahn 25 may kuni Montgomery's Jackson Hospital shifoxonasiga borganida bu yerdagilar adashmadi. CNN xabariga ko‘ra, Dr.Richard Sample "uni tekshirib, tezda aniq tashxis qo‘ygan". 

Shundan so‘ng, 26 mayda 1½ soatlik shoshilinch jarrohlik amaliyoti o‘tkazilgan. Jarrohlar Kayla Rahn tuxumdonidan salkam 22 yarim kg keladigan kistani olib tashlagan. 

Ortiqcha “vazn”ga sabab bo‘lgan kista muvaffaqiyatli olib tashlanganidan so‘ng, Kayla Rahn hayoti iziga tushmoqda.