Isroil Suriya harbiy samolyotini urib tushirdi

Isroillik harbiylar mamlakat havo kengliklariga kirgan «Suxoy» rusumli Suriya harbiy qiruvchi samolyotini «Petriot» havo hujumidan mudofaa tizimi orqali urib tushirdi. Bu haqda Isroil armiyasi bayonot bergan.

Samolyotga ikkita raketa uchirilgan va samolyot yerga qulagan. Uchuvchilarning taqdiri noma'lum.

Armiya vakilining ma'lumotiga ko‘ra, samolyot Isroil havo kengliklariga kirgunicha kuzatib turilgan.

Suriya harbiylari esa ushbu samolyot Golan tepaliklari yaqinida IShID jangarilariga qarshi harbiy amaliyot o‘tkazayotganida hujumga uchraganini ma'lum qilishgan.

«Isroil bizning harbiy samolyotimizga Yarmuq vodiysi yaqinidagi Saydi tumanida harbiy amaliyot o‘tkazayotganida, Suriya havo kengliklarida harakatlanayotganida hujum qildi», deya manba so‘zlarini keltirgan RIA Novosti.