Flydubai aviakompaniyasining FZ1073 reysida boʻlgan Yaniv Xayun ism-sharifli yoʻlovchisi zaxira borti orqali Tel-Avivga borganidan keyin Isroil bosh vaziri Binyamin Netanyahu bilan uchrashdi. U bu vaqtda hamon qonga belangan futbolkasida edi.
Isroil hukumati hodisani «terrorchilik hujumini amalga oshirishga urinish» deb baholamoqda. Hodisa yuzasidan tergov jarayoni davom etmoqda, gumonlanuvchining motivlari haqida hali rasmiy bayonot berilmadi.
Flydubai aviakompaniyasi esa surishtiruv ishlari yakunlanmaguncha Tel-Avivga parvozlarni toʻxtatgan.
Xayun ikkinchi uchuvchini zararsizlantirganidan keyin samolyotdagi vaziyat barqarorlashgan, bortga yoʻlovchi sifatida chiqqan boshqa ikki uchuvchi esa samolyotni Saudiya Arabistonining Tobuk shahridagi aeroportga favqulodda qoʻndirgan.
«Uchuvchilar kreslosida hech kim yoʻq edi»
Kasbi santexnik boʻlgan Xayun bosh vazir bilan suhbat chogʻida samolyot toʻsatdan balandlikni yoʻqota boshlaganda va ikki daqiqadan kamroq vaqt ichida 5,2 ming metrga pastlaganida qandaydir noxushlik roʻy berganidan shubhalanganini aytadi.
«Kimdir qichqira boshladi, svet oʻchdi», – deydi Yaniv Xayun Isroil bosh vaziri eʼlon qilgan videoyozuvda.
Shundan keyin u boshqa yoʻlovchilar bilan birga uchuvchilar kabinasi eshigini ochishga harakat qilgan, ammo bu oson ish emasdi.
«Pichoqdan jarohatlangan uchuvchi eshikka yopishib turgandi, shuning uchun biz uni ochishga qiynaldik», – deydi Xayun.
Ammo, uning soʻzlariga koʻra, yaralangan uchuvchi hushini yoʻqotishdan oldin eshikni ochib yuborishga ulgurgan.
«Men ichkariga kirganimda hujum qilgan uchuvchi boshqaruv paneli yonida, ikki kreslo oʻrtasida turganini koʻrdim… uchuvchilar kreslolarida hech kim yoʻq edi. Biri polda yotar, boshqasi boshqaruv paneli ustida edi. Ortimdan kabinaga yana bir yigit kirdi. Men hujum qilgan uchuvchiga tashlanib, boʻgʻish usulini qoʻlladim va tashqariga olib chiqdim», – degan Xayun.
