«Men bunga yoʻl qoʻya olmasdim» – hindistonlik uchuvchi nimalar boʻlganini aytib berdi

«Bilaman, Xudo meni qutqardi. Siz menga qoʻngʻiroq qildingiz va men ulkan faxr tuygʻusini his qilyapman. Men oldin oʻzim bilan faxrlanmaganman, ammo endi faxrlanyapman».

Favqulodda qoʻnishdan keyin kapitan avvaliga Saudiyaning Tobuk shahridagi shifoxonaga olib borilgan, keyin BAA poytaxti Abu-Dabiga koʻchirib oʻtkazilgan. The Telegraph maʼlumotiga koʻra, hozirda uning ahvoli barqarorlashgan. Modi bilan videomuloqot chogʻida uning boshi va qoʻli bogʻlanganini koʻrish mumkin.

Machchharga bortda birinchi yordamni koʻrsatgan stomatolog Shota Musayev keyinroq jurnalistlar bilan suhbatda kapitan ogʻir jarohat olgani, koʻp qon yoʻqotgani tufayli Isroilgacha yetib boradigan holatda boʻlmagani, shu tufayli Tobukka qoʻnish eng toʻgʻri yechim boʻlganini aytib bergan.

Uning oʻzi esa «bu jarohatni aynan jarohat sifatida qabul qilmaslikka harakat qilishi, chunki u holda tiklanish yanada qiyinroq boʻlishi»ni aytgan.

«Men bunga asta-sekin bosib oʻtiladigan va vaqt talab qiladigan yoʻl sifatida qarayman. Ammo tuzalib, yana sogʻlom boʻlishimga ishonchim komil», – degan u.

Samolyot qoʻnganidan keyin ikkinchi uchuvchi ham jarohatlangan holda shifoxonaga yetkazilgan, keyinroq Abu-Dabiga keltirilgan. Isroil bosh vaziri Binyamin Netanyahu ikkinchi uchuvchi «radikal mafkuraviy gʻoyalar taʼsiriga tushgani» va samolyotni qulatib, oʻz joniga qasd qilmoqchi boʻlganini aytdi. Bortdagi ikkinchi uchuvchini zararsizlantirgan yoʻlovchilarning soʻzlariga koʻra, u oʻzini oʻldirishlarini soʻragan.

Netanyahu hozircha tergovda yakuniy xulosalar yoʻqligini bildirgan. Shuningdek, Eronning ushbu voqeaga aloqadorligi belgilari ham aniqlanmaganini taʼkidlagan.

The Jerusalem Post nashrining tergov jarayonidan xabardor manbalari bergan maʼlumotga koʻra, ikkinchi uchuvchi faqat Oʻmon fuqaroligiga ega. Ushbu davlat esa Isroil bilan diplomatik munosabatlarga ega emas, shu tufayli ushbu voqeadan keyin oʻmonlik uchuvchi bu reysga qanday tayinlangani haqida savollar paydo boʻldi.

Gazetaning Isroil transport vazirligidagi suhbatdoshi Flydubai aviakompaniyasining ushbu mamlakatdagi faoliyati boʻyicha kelishuvga koʻra, Isroilga qoʻnadigan samolyotlardagi uchuvchilar Isroil bilan munosabatlarini normallashtirgan davlatlar fuqarolari boʻlishi kerakligini aytgan. Ammo The Jerusalem Post nashrining boshqa manbalari Isroil va BAA oʻrtasidagi aviaqatnovlar toʻgʻrisidagi kelishuvda bunday talab yoʻqligini aytishgan.

Tergov jarayonidagi hozircha javobsiz qolayotgan asosiy savollardan biri ikkinchi uchuvchi bortga pichoqni qanday olib chiqqani bilan bogʻliq. Samolyotga chiqishdan oldin uchuvchilar sinchiklab tekshiriladi. Bundan tashqari, aeroportda joylashgan restoranlarda pichoqlar hisobi yuritiladi.

Osprey Flight Solutions kompaniyasi agar hujumdagi terrorchilik motivi tasdiqlansa, Flydubai reysidagi hodisa soʻnggi yillarda yoʻlovchi samolyotdan foydalangan holda terakt sodir etishga boʻlgan eng yirik urinish boʻlishini maʼlum qilgan.