2011 yildan buyon transfer huquqi «Chelsi»ga tegishli bo‘lib kelgan Tibo Kurtua bugundan e'tiboran rasman «Real» futbolchisiga aylandi.
Belgiya terma jamoasining 26 yoshli futbolchisi bugun Madridda tibbiy ko‘rikdan o‘tib, «qirollik klubi» bilan 6 yillik shartnomaga imzo chekdi. Taqdimot marosimi «Santyago Bernabeu» stadionining prezident zalida bo‘lib o‘tgan.
Transfer qiymati 40 million yevroni tashkil etgani aytilmoqda.
Eslatib o‘tamiz, ushbu transfer doirasida «Real» yarimhimoyachisi Mateo Kovachich bir yillik ijara shartnomasi asosida londonliklar klubi safiga o‘tadi.
Avvalroq Kurtua «Chelsi» muxlislariga murojaatida jamoani nega tark etganiga izoh bergandi.
