G‘ijduvon va Konimex tumanlari chegaralari o‘zgartiriladi

Oliy Majlis Qonunchilik palatasining 27 avgust kuni navbatdagi majlisi bo‘lib o‘tdi. Bu haqda O‘zbekiston Respublikasi Oliy Majlisi Qonunchilik palatasining matbuot xizmati xabar bermoqda.

Deputatlar O‘zbekiston Respublikasi Oliy Majlisi Qonunchilik palatasining “Navoiy viloyatining Konimex tumani va Buxoro viloyatining G‘ijduvon tumani chegaralarini o‘zgartirish to‘g‘risida”gi qarori loyihasini ko‘rib chiqdilar.

Ta'kidlanganidek, mazkur qaror loyihasining qabul qilinishi Navoiy viloyati Konimex tumanining sanoat va qishloq xo‘jaligi yo‘nalishidagi ulushini oshirishga, shuningdek, Buxoro viloyati G‘ijduvon tumani Zafarobod qo‘rg‘oni ma'muriy hududida yashovchi aholiga qulay sharoitlar yaratish hamda tumanning ijtimoiy-iqtisodiy salohiyatini oshirishga xizmat qiladi.