O‘zmilliybank hamda Afrika eksport-import banki o‘rtasida 50 million AQSh dollarlik hamkorlik kelishuvi imzolandi

2018 yilning 5 sentabrida Toshkentda, Misr Arab Respublikasi Prezidenti Abdulfattoh Said Husayn as-Sisining O‘zbekiston Respublikasiga rasmiy tashrifi doirasida, O‘zbekiston Respublikasi Tashqi iqtisodiy faoliyat Milliy banki hamda Afrikaning eksport-import banki (Afreksimbank) o‘rtasida 50 million AQSh dollarlik hamkorlik haqidagi kelishuv imzolandi.

Kelishuv Afreksimbank bilan savdoni moliyalashtirish bo‘yicha hamkorlikni hamda Misr Arab Respublikasi va Afrika qit'asining boshqa mamlakatlaridan O‘zbekiston Respublikasiga tovar va xizmatlarni eksport qilinishni moliyalashtirish bo‘yicha kredit liniyalarini ajratishni ko‘zda tutadi.

Imzolangan kelishuv, O‘zbekistonning Misr va Afrikaning boshqa mamlakatlari o‘rtasida ikki tomonlama hamkorlikning mustahkamlanishiga imkon beradi, savdo hamda investitsiya aloqalarini rivojlantirishga xizmat qiladi.

O‘zbekistondan eksportning asosini tekstil, oziq-ovqat mahsulotlari, transport va turistik xizmatlar tashkil etadi. Misrdan  esa farmatsevtika, qishloq xo‘jaligi, maishiy kimyo mahsulotlari import qilinadi. E'tiborli jihati shundaki, ikki mamlakat o‘rtasidagi savdo-iqtisodiy aloqalarni yanada kengaytirish uchun katta imkoniyatlar mavjud.

Afrika eksport-import banki (African export-import bank, Afreximbank) — xalqaro tijorat banki. 1993 yilda tashkil topgan. Bankning bosh ofisi Qohirada joylashgan. Afreksimbankning aktivlari 11,9 mlrd. AQSh dollarini tashkil etadi. Bankning faoliyatining asosiy yo‘nalishi - butun Afrika qit'asidagi loyihalarni amalga oshirishni qo‘llab-quvvatlash.

Reklama huquqi asosida