9 sentabr kuni O‘zbekiston yoshlar ittifoqi hamda O‘zbekiston Milliy olimpiya qo‘mitasi hamkorligida O‘zbekiston Respublikasi Davlat mustaqilligining 27 yilligi bayrami munosabati bilan barcha hududlarning markaziy ko‘chalarida 10 km masofadan iborat bo‘lgan «Mustaqillik marafoni — 2018» bo‘lib o‘tdi.
Unda o‘quvchilar, talabalar, o‘ta-onalar va yosh oilalar, faxriylar hamda ommaviy axborot vositalari xodimlari qatnashdi.
Marafon yoshlarning bo‘sh vaqtini mazmunli tashkil etish, ular o‘rtasida sog‘lom turmush tarzini targ‘ib qilish, o‘zaro madaniy-sport aloqalarini yo‘lga qo‘yish hamda jismoniy tarbiya va sportni yoshlarning kundalik turmush tarziga kiritish, shuningdek, sog‘lom raqobat muhitini yaratish maqsadida tashkil etildi.
Yoshlarning bildirgan taklif va tashabbuslariga asosan, O‘zbekiston yoshlar ittifoqi Markaziy Kengashi, O‘zbekiston Prezidenti huzuridagi Xavfsizlik kengashi, Mudofaa vazirligi, Milliy gvardiyasi, Ichki ishlar vazirligi, Jismoniy tarbiya va sport vazirligi, Milliy olimpiya qo‘mitasi va O‘zbekiston yengil atletika federatsiyasi bilan hamkorlikda o‘tkazilgan ushbu marafonda maxsus veb-sayti – www.marafon.yi.uz saytida ro‘yxatdan o‘tgan 16 yoshdan 30 yoshgacha bo‘lgan ko‘ngilli yoshlar hamda faxriylar ishtirok etdi.
Marafon mahallalardagi yoshlar, ta'lim muassasalarida tahsil olayotgan 16-30 yoshgacha bo‘lgan yigit-qizlar hamda faxriy ko‘ngillilar o‘rtasida yengil atletika sport turi bo‘yicha o‘tkaziladigan yugurish qoidalariga muvofiq o‘tkazildi.
Erkaklar o‘rtasidagi yugurishda Vladislav Mamedov birinchi bo‘lib marraga yetib keldi. Ikkinchi va uchinchi o‘rinlarni Mirsaid Buxarov hamda Humoyun Mahmudov egalladi.
Ayollar o‘rtasidagi g‘oliblar uchligi Marina Xmelevskaya, Nurxon Muhiddinova hamda Kumila Qo‘chqorovadan iborat bo‘ldi.
