«Kun.uz» saytida e'lon qilingan «Rossiyaga qonuniy yo‘l bilan ishlash uchun ketgan mehnat migrantlari nega sarson etildi?» sarlavhali maqola yuzasidan Tashqi mehnat migratsiyasi masalalari agentligi tezkor tekshiruv-surishtiruv ishlari olib borildi.
Agentlikning mavzu yuzasidan xulosalarida quyidagilar bayon etiladi.
«Maqolada asosiy masala sifatida fuqarolarning qonuniy yo‘l bilan Rossiyaga ishlash uchun ketganiga qaramay, sarson-sargardon bo‘lib, qiyin ahvolda O‘zbekistonga qaytganliklari bayon etilgan.
Xususan, ish beruvchi tomonidan
- birinchidan, dastlabki shartnomada ko‘rsatilgan shartlar (kunduz 8 soatdan 3 kun, kechga 8 soatdan 3 kun ish, 3 kun dam olish)ning bajarilmagani;
- ikkinchidan, Rossiya Federatsiyasida qonuniy ishlash huquqini beruvchi ruxsatnoma berilishining noma'lum sabablarga ko‘ra kechiktirilgani;
- uchinchidan, og‘ir mehnat va og‘ir yashash sharoitlari tufayli ayrim fuqarolarning ish joyini tark etib, turli joylarda sarson-sargardon bo‘lishgani;
- to‘rtinchidan, fuqarolarga yetkazilgan ushbu moddiy va ma'naviy zararni qoplab berish kerakligi alohida ta'kidlanib, tegishli organlar tomonidan bu vaziyatga oydinlik kiritilishi aytilgan.
Mazkur holatni atroflicha o‘rganish hamda vaziyatni xolis baholash maqsadida Bandlik va mehnat munosabatlari vazirligi bu ishga taalluqli tashkilotlar va fuqarolar bilan suhbatlashib, vaziyatga oydinlik kiritgan.
Moskva shahriga ishlash uchun yuborilgan 23 nafar fuqarodan iborat guruhga boshliq etib tayinlangan Botir Mamasharifovich Bagirovning so‘zlariga ko‘ra, Domodedovo aeroportiga yetib borishlari bilan «Yevroosiyo Mehnat resurslari» MChJ xodimlari ularni kutib olib, qulay sharoitlarga ega avtobusda patent olgunlariga qadar yashab turadigan shinam yotoqxonaga yetkazgan. U yerda vaqtinchalik ro‘yxatdan o‘tkazib, kelgusida qilinadigan ishlar haqida ma'lumot berilgan. Biroq, guruhning ayrim a'zolari ruxsatnoma olish uchun to‘lanadigan pullarni bir haftaga kechiktirgani bois, ruxsatnomalar 8 kunga kechikib chiqqan. Bu vaziyatda fuqarolar o‘zlari aybdor bo‘lishiga qaramay, «Yevroosiyo Mehnat resurslari» MChJ o‘z hisobidan ularning yana 8 kunlik yashash va kuniga uch mahal ovqatlanish xarajatlarini qoplab bergan. Ruxsatnomani 2018 yil 30 iyulda olgan 13 nafar fuqaro ish beruvchining yoniga, Podolsk shahriga borishgan. Biroq, u yerda ish beruvchi tomonidan kunlik 160 rubl to‘lanadigan yotoq joy fuqarolarni qoniqtirmagani sababli, «Yevroosiyo Mehnat resurslari» MChJ xodimlari shu kunning o‘zida kunlik 220 rubl bo‘lgan boshqa yotoq joy bilan ta'minlagan. Ertasi kuni ish beruvchining vakili kelib, 2540 rubldan avans tarqatgan va ish tartibini tushuntirgan. Ish joyi uzoqroq bo‘lgani uchun ularni olib borib, olib keladigan avtobus ajratilgan. Shularni inobatga olib, ularga 12 soatlik ish rejimi, ya'ni kunduzi 3 kun, kechasi 3 kun va 3 kun dam olish taklif etilgan. Guruh faqatgina 30 iyuldan 14 avgustgacha mehnat faoliyatini amalga oshirgan. Shu vaqt oralig‘ida ish beruvchi guruhdagi har bir odamga 3 marta, jami 9500 rubldan avans puli bergan.
