Angrenda O‘qituvchi va murabbiylar kuni nishonlandi

27 sentabr kuni Angren shahrida O‘qituvchi va murabbiylar kuniga bag‘ishlangan - “Dunyoda muallim bo‘lmasa agar, hayot ham bo‘lmasdi bu qadar go‘zal” deb nomlangan bayram tadbiri bo‘lib o‘tdi.

Ushbu bayram tadbiri turli uchrashuv va qiziqarli dasturlarga boy bo‘ldi. Xususan, tadbirda ko‘p yillik tajribaga ega faxriy o‘qituvchilar, sohadagi faoliyati davomida yuqori ko‘rsatkichlarga erishayotgan ustoz va murabbiylar, yosh pedagoglar taqdirlandi. 

Tadbirda Toshkent viloyati Xalq ta'limi boshqarmasi, shahar hokimligi, siyosiy partiyalar deputatlari, sohada ko‘p yillik tajribaga ega faxriy ustoz va murabbiylar, umumiy o‘rta ta'lim maktablarining ilg‘or o‘qituvchilari hamda jamoat tashkilotlari vakillari ishtirok etdi.

Unda 2017-2018 yilgi o‘quv mavsumida Angren shahar Xalq ta'limi bo‘limiga qarashli umumiy o‘rta ta'lim maktablarida faoliyat olib borayotgan o‘qituvchi va murabbiylar tomonidan ko‘plab yutuqlarga erishilayotgani qayd etildi. 

O‘qituvchilarning samarali mehnatini o‘quvchilar qayd etayotgan natijalarda ham ko‘rish mumkin. Jumladan, ushbu o‘quv yili davomida 24 nafar maktab o‘quvchilari fan olimpiadalarining Toshkent viloyat bosqichida g‘olib chiqib, respublika yo‘llanmasini qo‘lga kiritishdi. Maktab o‘quvchilari o‘rtasida o‘tkazib kelinayotgan “Bilimlar bellashuvi” tanlovida esa 12 nafar o‘quvchi respublika bosqichi yo‘llanmasiga ega bo‘ldi.

Shuningdek, Innovatsion olimpiadalarning respublika bosqichida angrenlik 3 nafar o‘quvchilar muvaffaqiyatli qatnashdi.

-Bu muvaffaqiyatlar Angren shahridagi maktablarda mehnat qilayotgan barcha 2096 nafar ustoz-murabbiylarning mehnati sifatida bilaman, - deya e'tirof etdi tadbirda so‘zga chiqqan Angren shahar Xalq ta'limi bo‘limi mudiri Sherzod Mirzakarimov.

Tadbir davomida shaharning 17- va DIMI o‘qituvchilari Bibiniso Mirsaitova hamda Hafiza Habibullayevalar xalq ta'limi tizimidagi samarali mehnati, “Ta'lim to‘g‘risida”gi qonun, “Kadrlar tayyorlash milliy dasturi”ni hayotga tatbiq qilish, yoshlarni milliy istiqlol g‘oyasi va qadriyatlar ruhida tarbiyalashda erishgan muvaffaqiyatlari uchun “O‘zbekiston Respublikasining xalq ta'limi a'lochisi” ko‘krak nishoni bilan taqdirlandi.

Shuningdek, Rohila Abduqodirova, Mayram Mirzabayeva, Do‘stmurod Qurolov kabi pedagoglarning tizimdagi samarali faoliyati Xalq ta'limi vazirligi tomonidan faxriy yorliq va qimmatbaho sovg‘alarga loyiq ko‘rildi. 

Bayram tadbirida taniqli so‘z ustalari hamda estrada yulduzlarining chiqishlari mehmonlarga xush kayfiyat ulashdi.