«Real» klubining sobiq bosh murabbiyi Zinedin Zidan «Yuventus»da rahbarlik lavozimiga tayinlanishi mumkin.
Tuttosport tarqatgan ma'lumotga ko‘ra, «Yuve» rahbariyati 46 yoshli mutaxassisni klub bosh direktori lavozimiga tayinlash haqida bosh qotirmoqda. Eslatib o‘tamiz, amaldagi bosh direktor Juzeppe Marotta 25 oktabrda o‘z lavozimini tark etishini e'lon qilgan.
Avvalroq Marotta «Yuventus» prezidenti Andrea Anelli bilan kelisha olmayotgani bois ishdan ketishi haqida aytgani xabar qilingan edi.
Manbada qayd etilishicha, ayni paytda klub tizimida ishlayotgan Pavel Nedved va Fabio Paratichi, shuningdek, Italiya futbol federatsiyasining amaldagi ijrochi direktori, UYeFA vitse-prezidenti Mishel Uva ham «keksa sinora»da bosh ijrochi direktor lavozimiga nomzodlar orasidan joy olgan.
Eslatib o‘tamiz, kecha Zinedin Zidan «Manchester Yunayted» bilan muzokaralarga kirishgani ma'lum qilingan, ammo klub bu xabarni rad etib chiqqan edi.
Ma'lumot o‘rnida, fransiyalik mutaxassis 1996-2001 yillar mobaynida «Yuventus» safida to‘p surib, ikki karra Italiya chempioni bo‘lgan. Shundan so‘ng u 2001 yilda o‘sha vaqtda jahon rekordi bo‘lgan summa – 77 million yevro evaziga «Real»ga o‘tgan.
