Ispaniyaning Marca gazetasi 8-sentabr kuni Fransiya milliy jamoasi bosh murabbiyi Zinedin Zidanga tegishli deyilgan Lionel Messi haqidagi fikrlarni oʻz ichiga olgan materialni chop etdi.
Nashr versiyasiga koʻra, Zidan goʻyo 2026-yilgi «Oltin toʻp» uchun argentinalikka «yuz marta ovoz berishga tayyorligini» aytgan, uning 39 yoshdagi oʻyinlarini «gʻayrioddiy» deb atagan va Messining tarixdagi eng buyuk oʻyinchi maqomiga shubha qilish «futbolni tushunmaslikni» anglatishini taʼkidlagan.
Marca nashri bu soʻzlarning manbasini koʻrsatmadi. Matnda na intervyu, na matbuot anjumani, na biror audioyozuv bor edi. Shu kuniyoq Marca nashriga tayanib koʻplab nufuzli nashrlar - Goal, Yahoo, Gulf News va boshqalar bu iqtiboslarni qayta chop etib, tarqatdi.
Oradan bir kun oʻtgach, Marca saytidan ushbu bahsli iqtiboslar gʻoyib boʻldi. Tahririyat bu borada na raddiya eʼlon qildi, na uni oʻchirish sababini izohladi. Zidanning oʻzi va Fransiya futbol federatsiyasi (FFF) ham vaziyat yuzasidan sukut saqladi.
Ushbu materialni tarqatgan Shveysariyaning Watson portali Marca tekshirilmagan maʼlumotni chop etgan boʻlishi mumkinligini taxmin qildi. Iqtibosning asl manbasi - parodiya akkaunt, avtomatik yaratilgan matn yoki bayon qilishdagi xatolik boʻlishi mumkin.
Nega Zidanning soʻzlari shov-shuv keltirib chiqardi?
Bunday shov-shuvga sabab nafaqat iqtibosning mazmuni, balki u nisbat berilgan shaxs hamdir. Zidan - «Real»ning sobiq oʻyinchisi va murabbiyi, Krishtianu Ronaldu bilan birga Chempionlar ligasining uch karra gʻolibi. «Barselona» va Messi esa «Real» uchun qariyb yigirma yil davomida asosiy raqib boʻlib kelgan. Zidan Madrid klubini boshqargan paytda «Ronaldu yoki Messi?» degan savolga boshqacha javob bergan: eng zoʻri - «Real»da oʻynaydigan futbolchi.
Shu sababli, Messi uchun yuz marta ovoz berish va GOAT (tarixdagi eng buyuk oʻyinchi) borasidagi bahsga nuqta qoʻyish haqidagi gaplar shaxsiy fikr sifatida emas, balki «qarorgohni oʻzgartirish» sifatida qabul qilindi. Aynan shu ziddiyat matnning tez tarqalishi va shov-shuvga sabab boʻldi.
