Turkiya 4 ta gol oʻtkazdi, Zidan hissiyotlariga erk berdi
|12:077 87111 min
Millatlar ligasi guruhlarida 2-tur oʻyinlari davom etmoqda. Italiya safarda yirik gʻalabaga erishdi, Fransiya Belgiya bilan oʻyinda qiynaldi.
Foto: Joris Verwijst/Getty Images/translyatsiyadan kadr Maykl Olise va Usmon Dembele gʻalaba golini nishonlamoqdaFoto: Joris Verwijst/Getty Images/translyatsiyadan kadr Maykl Olise va Usmon Dembele gʻalaba golini nishonlamoqda
A ligasi, 1-guruhi
Zidanda yana minimal gʻalaba
Belgiya – Fransiya 0:1 Gol: Olise, 88 (0:1) Belgiya: Lammens, Mehele, Ngoy, Seys (De Kyuyper, 68), Kastan, Lavia (Raskin, 85), Tilemans, De Bryuyne (Vanaken, 63), Godts, Moreyra (Lukebakio, 63), De Ketelare (Fernandes-Pardo, 85) Fransiya: Menyan, Jake, Lakrua, Diuf, Kalulu, Da Kunya (Kone, 90), Kamavinga, Akliush (Sherki, 77), Barkolya (Olise, 77), Due, Lepol (Dembele, 68) Ogohlantirishlar: Moreyra, 42. De Bryuyne, 57. Tilemans, 66
Fransiya milliy jamoasi Zinedin Zidan boshqaruvida ikkinchi oʻyinini oʻtkazdi. 1-turda Turkiya maydonidan qiyin gʻalaba (1:0) bilan qaytgan fransuzlar bu turda Belgiyaga safar qilishdi. Zidan bu oʻyinda qator yetakchilarni (Dembele, Olise, Sherki, Yupamekano va Rabio kabilar) zaxirada qoldirdi, Mbappe esa jarohat tufayli safdan chiqqan. Natijada koʻpchilik muxlislar uchun notanish boʻlgan Lukash Da Kunya, Esteban Lepol, Jeremi Jake, Andi Diuf kabi futbolchilar ilk daqiqalardan maydonga tushdi.
Fransuzlar toʻpga egalik qilishdi va koʻproq zarba berishdi (10 ga qarshi 18 ta, shundan 9 tasi darvoza sohasiga toʻgʻri borgan), ammo Mark van Bommel boshqaruvidagi belgiyaliklar ham tengma-teng kurash olib borishdi va bir qancha xavfli vaziyatlar yaratishdi. Masalan, birinchi boʻlimda Kevin de Bryuyne Sharl de Ketelareni boʻsh darvoza qarshisiga chiqargandi, ammo hujumchi toʻpga moslasha olmadi.
Natijada barchasi oʻyin oxirida, 88-daqiqada hal boʻldi: Zidan baribir asosiy tarkib futbolchilariga murojaat qilishiga toʻgʻri keldi va 77-daqiqada Sherki hamda Oliseni maydonga tashladi. Birinchisi pas berdi, ikkinchisi toʻp bilan jarima maydoniga kirib borib, ikki himoyachi yoʻlini toʻsib chiqqaniga qaramay, toʻpni burchakka aniq yoʻnaltirdi.
Soʻnggi daqiqalarda urilgan gʻalaba golini esa Zinedin Zidan hissiyotga berilib nishonladi. Oʻz qarori toʻgʻri chiqqanidan xursand boʻlgan murabbiy maydon chetida oʻrnatilgan toʻpni kuch bilan tepib yubordi va oldinga yugurdi.
Oʻttiz yil muqaddam Vinchenso Montella va Roberto Manchini Sven-Yoran Eriksson boshqaruvidagi «Sampdoriya»da hujum tandemini tashkil etardi. Yosh Vinsenso oʻshanda genuyaliklar jamoasiga endigina kelgandi. Roberto esa oxirgi mavsumini oʻtkazayotgandi va bu forvardlar juftligi oʻsha mavsumda birgalikda 37 gol urishadi. Keyinroq ular Italiyada klublar murabbiylari sifatida toʻqnashgandi: Montella boshqaruvidagi «Fiorentina» Manchinining «Inter»ini magʻlub etgan, keyinroq milanliklar Montellaning navbatdagi jamoasi «Sampdoriya»dan ustun kelgan. Endi ular terma jamoalar miqyosida uchrashishdi.
Yomgʻirli Istanbulda italyanlar oʻzini juda qulay his qilishdi va ilk daqiqlaardan hujumkor oʻynashdi. Avvaliga Pio Espozitoning xavfli zarbasini darvozabon Oltoy Bayindir barmoqlari uchlari bilan toʻxtatishga erishgandi, ammo keyingi hujumda hisob baribir ochildi: burchak zarbasi yerlatib oʻynalganida himoyachi Zeki Chelik toʻpni tepib yubora olmadi, Bastoni esa jarima maydoni markazidan turib darvozani ishgʻol etdi. Bu Italiyaning Manchini bosh murabbiylikka qaytganidan keyingi ilk goli boʻldi.
Boʻlim oʻrtalarida esa himoyachi Maykl Kayodening hujumga qoʻshilishi gol bilan yakunlandi. Uning zarbasidan keyin darvozabon toʻpni qaytargandi, ammo toʻp Frattezining oyoqlari ostiga kelib tushdi. «Skuadra adzurra» hujum qilishda davom etdi va 27-daqiqadayoq uchta toʻp farqi bilan oldinga chiqib oldi: bu safar Kayodening oʻzi barchasini hal qildi.
Ikkinchi boʻlim boshida turklar oʻziga kelgandek boʻldi va Barish Yilmaz hisobni qisqartirdi. Ammo mehmonlar tezda toʻrtinchi golni ham urishdi: Tonalining zarbasidan keyin ustundan qaytgan toʻpga birinchi boʻlib Pio Espozito yetib bordi. Qolgan vaqt mobaynida Turkiyaning intrigani qaytarishga boʻlgan urinishlari besamar ketdi.
Italiya nihoyat yorqin oʻynay boshladi va dastlabki ochkolarni qoʻlga kiritdi, Turkiyada esa ikki turdan keyin birorta ham ochko yoʻq.
Polyaklar ilk daqiqalardanoq shvedlarning kuchli bosimi ostida qoldi va bu hujumlar burchak zarbasi orqali tezkor gol urilishi bilan yakunlandi. Lindelyofning uzatmasi shunchalik muvaffaqiyatli chiqdiki, toʻp darvoza qarshisida turgan Nugrenning boshiga yetib bordi. Birinchi boʻlim oʻrtalaridan esa «Oq burgutlar» tashabbusni oʻz qoʻliga olishdi va mezbonlar darvozaboni bir necha bor qahramonlik qilishiga toʻgʻri keldi. Ammo boʻlim oxirida Shimanski Zalevskining qanotdan uzatmasiga yetib borib, hisobni tenglashtirdi.
Shvetsiya esa tanaffusdan katta ishtiyoq bilan qaytdi va yana ketma-ket hujumlar bilan raqibning koʻzini ochirmadi, bu hujumlar yakunida yana kornerdan ikkinchi golni urdi. Toʻp yerlatib Ayari turgan nuqtaga yetkazib berildi, «Brayton» futbolchisi bir harakat bilan himoyachini yoʻldan oldi, ikkinchi harakatida qaytarib boʻlmas zarba yoʻlladi. Grem Potterning oʻyin uchun ishlanmalari oʻzini oqladi, Yokeresh esa qatorasiga ikkinchi oʻyinni ham golsiz tark etmadi. «Arsenal»da Kay Havers yaxshi sport formasida ekani tufayli bu mavsum startida zaxirada qolib ketgan futbolchi terma jamoa yigʻinida oʻziga boʻlgan ishonchni va sport formasini tiklamoqda. Shvedlar esa qatorasiga ikki gʻalabadan keyin guruh jadvalida yakkapeshqadam boʻlib olishdi.
Ruminiy oʻz maydonidagi oʻyinni muxlislarsiz oʻtkazishga majbur boʻldi – UEFA mahalliy muxlislarning 2024-yil Kosovoga qarshi oʻyindagi xatti-harakatlari uchun intizomiy jazo qoʻllagandi. Bu kunning eng sermahsul oʻyiniga aylandi: oʻz muxlislari qoʻllovisiz qolgan mezbonlar birinchi boʻlimdayoq uchta gol oʻtkazib yuborishdi, bu gollarga Birlidjaning birgina goli bilan javob qaytarildi, ikkinchi boʻlim boshida esa bosniyaliklar toʻrtinchi golni ham urishdi. Ruminiya yana bir bor hisobni qisqartirdi, ammo baribir intrigani qaytara olmadi. George Haji jamoasi qatorasiga ikki oʻyinda yutqazib, guruh jadvalida soʻnggi oʻrinda bormoqda.
Shimoliy Irlandiya – Vengriya 0:0 Shimoliy Irlandiya: P. Charlz, Makkonvill, Braun, Atcheson, Gelbreyt, Sh. Charlz, Devenni, Hyum, Prays (Magennis, 88), Kelli (Spenser, 70), Donli (D. Charlz, 70) Vengriya: B. Tot, Chinger, Orban, Kerkez, Bolla (Oshvat, 34), Shefer, Chenvay (Vitalish, 76), Syuch (A. Tot, 55), Soboslai, Yurek (Baran, 55), Lukach (M. Tot, 77) Ogohlantirishlar: Gelbreyt, 16. Prays, 31. Donli, 45. Sh. Charlz, 77 – Chenvay, 42
Gurjiston milliy jamoasi birinchi turda Shimoliy Irlandiyaga qarshi oʻta nursiz oʻyin koʻrsatganidan (0:1) keyin mahalliy federatsiya 2021-yildan buyon jamoani boshqarib kelgan Villi Saniyolni isteʼfoga chiqardi va uning oʻrniga yoshlar jamoasi ustozi Ramaz Svanadzeni yangi bosh murabbiy etib tayinladi. 45 yoshli mutaxassis boshqaruvidagi ilk oʻyinda gurjilar ukrainlarga qaraganda yaxshiroq harakat qilishdi, ikki baravar koʻproq zarba berishdi (14:7), ammo baribir gol ura olishmadi.
Guruhdagi ikkinchi oʻyinda ham muxlislar gol koʻrishmadi. Shimoliy Irlandiya va Vengriya oʻyini koʻproq qoʻpolliklar bilan yodda qoldi va hakam olti marta kartochkalarini choʻntagidan chiqardi.
2-oktabr. Vengriya – Gurjiston, Ukraina – Shimoliy Irlandiya.
Armaniston oʻz uyida Chernogoriya bilan quvlashmachoq oʻynab, yutqazdi – 2:3. Mezbonlar oʻyin davomida ikki bor hisobni tenglashtirishdi, ammo durangni ushlab qola olishmadi: hal qiluvchi gol 89-daqiqada urildi. Oʻyining asosiy haylayti – Eduard Spersyanning ikkinchi boʻlim oʻrtalaridagi goli boʻldi: u raqibning uch futbolchisidan qochib ketdi va toʻpni jarima maydoni tashqarisidan yoʻllangan zarbasi bilan toʻqqizlikka joylashtirdi.
Latviya va Kipr oʻyinida esa birorta gol urilmadi – 0:0. Kipr koʻproq vaqt davomida toʻpga egalik qilib, 18 bor zarba berdi va 1,19 xG koʻrsatkichini qayd etdi, ammo safardan birgina ochko bilan qaytdi.
2-oktabr. Kipr – Armaniston, Latviya – Chernogoriya.
