Argentinada O‘smirlar olimpiadasi start oldi

7 oktabr kuni Argentina poytaxti Buenos-Ayres shahrida III o‘smirlar yozgi Olimpiya o‘yinlarining tantanali ochilish marosimi o‘tkazildi.

Tantanali marosim Buenos-Ayresning mashhur «Obelisco» maydonida tashkil etildi. Marosimning kirish qismidan so‘ng, ishtirokchi mamlakatlar bayroqdorlari chiqib kelishdi. O‘zbekiston sport delegatsiyasida erkin kurashchi Muhammadrasul Rahimov bayroqdor vazifasini bajardi.

«Tadbir davomida yig‘ilganlar ajoyib lazer shou guvohiga aylanishdi. Akrobatchilar esa o‘zlarining murakkab chiqishlari bilan barchaning olqishiga sazovor bo‘lishdi. Ular sportchilarga xos iroda, qiyinchiliklarga qaramay g‘alabaga bo‘lgan intilishni namoyish etib berishdi. Marosim uchun maxsus dastur ishlab chiqilgan edi. Bir so‘z bilan aytganda Argentina o‘yinlarga yuqori saviyada tayyorgarlik ko‘rgani ma'lum bo‘ldi», deyiladi Milliy olimpiya qo‘mitasi matbuot xizmati xabarida.

Xalqaro olimpiya qo‘mitasi bayrog‘i ko‘tarilganidan so‘ng o‘smirlar Olimpiya o‘yinlariga rasman start berildi. Bugun o‘zbekistonlik sportchilar musobaqada bahslarga kirishadi.

O‘yinlarning birinchi kunida quyidagi sportchilar O‘zbekiston sharafini himoya qilishadi:

Akademik eshkak eshish
Luizaxon Islomova (yakkalik, saralash)
Yevgeniy Agafonov, Davrjon Davronov (juftlik, saralash)

Dzyudo
-66 kg: Jayxunbek Nazarov (saralash va final)

Taekvondo
-48 kg: Ulug‘bek Rashidov (saralash va final)

Suzish
Bibigul Minglibayeva (brass, 50 metr, saralash)
Aleksey Sidorchuk (brass, 100 metr, saralash)

Sport akrobatikasi
Nikolay Yevdokimov va Xursana Magzumova (mikst, saralash va final)

Sport gimnastikasi
Abdulaziz Mirvaliyev (ot ustida bajariladigan mashqlar, saralash)
Indira O‘lmasova (erkin dastur, kompleks mashqlar, saralash)