Kuchli beshlik: «Yerliklar» o‘rtasida kechadigan klasiko, Xabibga aylangan Mourino va boshqalar

Yevropada kuchli beshlik chempionatlarida dam olish kunlarida navbatdagi tur uchrashuvlari davom etdi. «Tribuna» uikendning eng asosiy voqealarini keltiradi.

Levandovski ortidan...

Bundesliga ixlosmandlari oxirgi marta penta-trikni ikki yil oldin tomosha qilishgandi. «Volfsburg»ga qarshi o‘yinning ikkinchi bo‘limida maydonga tushgan Levandovski 6:1 hisobidagi g‘alabada o‘zining besh goli bilan ishtirok etgandi. Qizig‘i, bu safar ham, «Bavariya» «Volfsburg»ga qarshi maydonga tushgan turda bunday muvaffaqiyat takrorlandi. Lekin boshqa o‘yinda. Yozda Niko Kovach sobiq jamoasi «Ayntraxt»dan «Bavariya»ga olib kelishni juda istagan 20 yoshli serbiyalik hujumchi Luka Yovich hozirda ham frankfurtliklar jamoasi sharafini himoya qilmoqda. «Fortuna» darvozasiga beshta gol urgan Luka birato‘la bir nechta rekordni qayd etdi. U endi Bundesligada bir o‘yinda besh gol urgan eng yosh futbolchi va shuningdek, «Ayntraxt» tarixidagi yagona penta-trik sohibidir.

Luka Yovich aslida hali ham «Benfika» a'zosi hisoblanadi va Frankfurtda ijara shartnomasi asosida to‘p surmoqda. Lekin shartnomada agar nemis klubi futbolchini sotib olishni istasa, 12,5 million yevro to‘lab, bu ishni amalga oshirishi mumkinligi qayd etilgan. Hozirdan aytish mumkinki, «Ayntraxt» bo‘lajak yulduzning qayta transferidan yaxshigina daromad qilishi mumkin.

Shuningdek, bu turda «Bavariya» ham nihoyat g‘alabali yo‘lga kirib oldi. Ammo hozircha «Borussiya»ni to‘xtatib bo‘lmayapti.

Fergyusonni sog‘inib...

Aynan Aleks Fergyuson davrida «Manchester Yunayted» oxirgi marta «Stemford Brij»da mezbonlar ustidan g‘alaba qozongan. Bu voqea 2012 yilning kuzida sodir bo‘lgandi. Joze Mourino o‘tgan shanba kuni bu sovuq an'anani buzishga juda yaqin turgandi, ammo uning shogirdlari qandaydir soniyalargacha chiday olishmadi. Portugaliyalik mutaxassis esa, «Chelsi» yordamchi murabbiyi bilan urishib ketdi. Sarrining yordamchilaridan biri Ros Barklining 96-daqiqada urgan goliga shu qadar xursand bo‘ldiki, bir-ikki marta Mourinoni mazax qilib, uning oldidan bayramona yurish qilib o‘tdi, bu esa, Jozega yoqmadi. Xabib Nurmagomedov uslubida o‘z o‘rnidan sakrab chiqqan portugaliyalik murabbiyni qo‘riqchilar arang to‘xtatib qolishdi.

Voqea britancha vazminlik bilan hal etildi. Janjalning barcha ishtirokchilari bir-birlaridan uzr so‘rashdi. Faqat «Manchester Yunayted»ning bu stadiondagi g‘alabasi yana noma'lum muddatga qoldirildi.

APLda 9 turdan so‘ng birato‘la uch jamoa mag‘lubiyatsiz odimlamoqda. Angliya chempionatida bunday holat uchinchi marotaba qayd etilmoqda. 1978/79 va 1990-91 yilgi mavsumlarda ham uch jamoa 9 turni mag‘lubiyatsiz o‘tkazgan va qizig‘i, o‘sha uchliklarda ham «Liverpul» bo‘lgan. Bu mavsumlarning birinchisida «Liverpul» chempion bo‘lgan, ikkinchisida esa, «Arsenal»...

Yerliklar o‘rtasidagi Klassiko

Nihoyat bu safar «el-klasiko» yerliklar o‘rtasida kechadigan ko‘rinadi. Yo‘lini yo‘l-yo‘llar bilan tutashtirib Turinga ketib qolgan Krishtianu Ronalduning ortidan, Leo Messi ham kutilayotgan o‘yinni o‘tkazib yuboradi. Turnir jadvalini boshqarib turgan «Sevilya» ustidan qozonilgan g‘alaba va «Barselona» yana peshqadamga aylanib olishi Leo Messining jarohati soyasida qolib ketdi.

O‘n ikki daqiqada bir gol va golli pasni amalga oshirib, mezbonlar uchun komfort hisob qayd etilishida bosh rolni ijro etgan Messi 26-daqiqada qo‘lini sindirib oldi. Avvaliga butun «Kamp Nou»ga qo‘shilib, Valverde ham bu hodisaga ishonmadi, toki futbolchining qo‘li bog‘lanib, stadionni tark etguncha, u Messining o‘rniga futbolchi tushirishga shoshilmay turdi. Sardorsiz «Barselona» esa, go‘yoki, «Sevilya» bilan teng kuchli jamoaga aylanib qoldi. 2:2 – bu Messi chiqib ketgandan keyingi 75 daqiqaning hisobi. Xabarlarga qaraganda, Messi endi bir oy maydonga tusha olmaydi. Argentinalik hujumchi klasikodan tashqari, YeChL doirasida «Inter»ga qarshi ikki o‘yinni, shuningdek, Ispaniya Kubogi doirasida «Leones», chempionat doirasida «Rayo Valekano», «Betis» va balki «Atletiko»ga qarshi bahslarni ham o‘tkazib yuborishi mumkin.

Xullas, 11 yildan keyin ilk marta el-klasikoda maydonda Messi ham, Ronaldu ham bo‘lmaydi.

Shu bilan birga, «Real»ning muammolari ham o‘ziga yetarli. Xulen Lopetegi jamoasi 1985 yildagi antirekordini yangiladi – jamoa 481 daqiqani golsiz o‘tkazdi. Marseloning goli ushbu seriyani mana shu ko‘rsatkichda to‘xtatgan bo‘lsa-da, madridliklarga ochko olib kelmadi. «Real» endi o‘z maydonida «Levante»ni yuta olmayapti. Qutqarish kerak.

Bu vaziyatga yechim katta ehtimol bilan Lopetegining iste'fosi bilan yakunlansa kerak.

Sotma, kuyasan

«Bordo»ning «Monpele»dagi mag‘lubiyati u qadar e'tiborga arzimas, ammo bu o‘yinda hisobni ochgan futbolchi Gaytan Labord bo‘lganini aytsak-chi? Ya'ni hayronsiz, shundaymi?

Yozda «Bordo» aynan Labordni «Monpele»ga sotib yuborgandi va bu transfer jamoaning o‘sha paytdagi murabbiyi Gustavo Poyyetning jahlini chiqarib yuborgan. Urugvaylik murabbiy yetakchi futbolchini u bilan maslahatlashmay sotib yuborishgani uchun klub rahbariyatni matbuotda tanqid qilishgacha borgan. Bu voqeaning oqibati Poyyetning iste'fosi bilan yakunlagandi.

«Agar murabbiy va rahbariyat o‘rtasida qandaydir kelishmovchilik bo‘lgan bo‘lsa, bu mening muammoim emas», – deb yozdi g‘alabadan keyin Gaytan Labord.

Yevropa Ligasidagi navbatdagi o‘yin oldidan «Bordo» mag‘lubiyatga uchradi va bu o‘yinda 8.2 ball bilan eng yaxshi o‘yinchi deb topilgan Labordni sotib yuborish noto‘g‘ri qaror bo‘lganini Poyyetning o‘rnida ishlayotgan Rikardo Gomes ham ichida tan olsa kerak. Lekin ayta olmaydi...

Milan derbisida yangi qahramon

Gonsalo Iguain Milan derbisida o‘ynashni juda istagan edi. Jurnalistlar u va boshqa bir argentinalik hujumchi Mauro Ikardi o‘rtasidagi qarama-qarshilik haqida so‘rayverib bezor ham qilib yuborishdi. «San-Siro»dagi derbida bu ikki hujumchi asosiy qahramonlar bo‘lishi kutilayotgandi.

«Bu tennis emas, futbol, har ikki tomonda o‘n bir kishidan futbolchi to‘p suradi», – ta'kidladi Gonsalo.

Shunday bo‘lib chiqdi ham, muxlislar to‘qson daqiqa davomida futbolchilarning taktik bahslarini tomosha qilishdi. Lekin, baribir Maruo Ikardi boshqalardan ko‘ra jiddiyroq tayyorlanganini isbotladi. Uning dastlabki goli ofsayd tufayli bekor qilingan bo‘lsa, hakam tomonidan qo‘shib berilgan daqiqalarda uchrashuvdagi g‘alaba golini urdi. Iguain bu qarama-qarshilikda mag‘lubiyatga uchradi.

Qizig‘i, bu Ikardining Milan derbisidagi ilk qahramonligi emas. O‘tgan yilning oktabrida bo‘lib o‘tgan to‘qnashuvda Ikardi het-trik qayd etgan va qizig‘i, o‘sha o‘yinda ham g‘alaba goli so‘nggi daqiqalarda amalga oshgandi.

Bu turda shuningdek, «Yuventus» mavsumda ilk marta ochko yo‘qotdi. «Old Trafford»ga safar oldidan «Jyenoa»ni qabul qilgan turinliklar jamoasi Krishtianu Ronalduning golidan so‘ng hisobda oldinga chiqib olishgandi. Ammo mehmonlar ikkinchi bo‘limda hisobni tenglashtirishdi. Shunday bo‘lsa-da, «Yuventus» eng yaqin ta'qibchisidan 4 ochko oldinda bormoqda.