21 oktabr kuni Ispaniya La Ligasida 9-turning to‘rtta uchrashuvi bo‘lib o‘tdi.
Oxirgi to‘rt o‘yindan buyon g‘alaba qozona olmay kelayotgan «Xetafe» bu turda autsayder «Rayo Valekano» mehmoni bo‘lib, 2:1 hisobida g‘alaba qozondi. «Eybar» maydoniga safar qilgan «Atletik» esa 1:1 hisobida durang o‘ynadi. Basklarning 1-turdagi g‘alabasi hamon so‘nggi muvaffaqiyat bo‘lib qolmoqda. Jamoa shu hafta o‘rtasida 3-turning kechiktirilgan bahsida «Rayo Valekano» bilan kuch sinashadi.
Kecha, shuningdek, boshqa bir autsayder - «Ueska» klubi ham navbatdagi mag‘lubiyatini qabul qilib oldi: «Espanol» safarda Borja Iglesiasning (yuqoridagi suratda) dubli evaziga g‘alaba qozonib, musobaqa jadvalida ikkinchi o‘ringa ko‘tarilib oldi. Kunning so‘nggi o‘yinida «Valyadolid» minimal hisobda «Betis»ni mag‘lub etdi va 6-pog‘onani band etdi. Endi ushbu ikki g‘olib jamoa keyingi turning ilk o‘yinida o‘zaro kuch sinashadi.
«Espanol» va «Real Valyadolid»ning kechagi g‘alabalaridan so‘ng Madridning «Atletiko» va «Real» klublari mos ravishda beshinchi va yettinchi o‘rinlarga tushib qoldi.
Ispaniya chempionati
9-tur, 21 oktabr
Rayo Valekano – Xetafe 1:2 (0:0, 1:2)
Gollar: 0:1 – 63 Fulke, 0:2 – 67, avtogol Akeme, 1:2 – 74 de Tomas.
Chetlatish: Trexo (90, Rayo Valekano).
Eybar – Atletik 1:1 (1:1, 0:0)
Gollar: 1:0 – 17, penalti Sharles, 1:1 – 21 Inyaki Uilyams.
Ueska – Espanol 0:2 (0:1, 0:1)
Gollar: 0:1 – 41 Iglesias, 0:2 – 64 Iglesias.
Betis – Valyadolid 0:1 (0:1, 0:0)
Gol: 0:1 – 35 Antonito.
19 oktabr
Selta – Alaves 0:1 (0:0, 0:1)
Gol: 0:1 – 58 Pina.
