Marselo og‘ir damda «Real»ni tark etmoqchi

«Real» himoyachisi Marselo klubdan ketishni istamoqda.

Tuttosport nashri ma'lumotiga ko‘ra, braziliyalik futbolchi yanvar oyidayoq o‘zini «Yuventus»ga qo‘yib yuborishlarini so‘rab, «Real» rahbariyatiga murojaat qilgan. Ta'kidlanishicha, u mavsum boshidan buyon klub rasmiylariga bir necha marotaba mazkur masalada iltimos bilan chiqib, iyungacha kuta olmasligini aytib keladi.

Manbaga ko‘ra, Marselo Turin klubining o‘ziga nisbatan befarq emasligini biladi va o‘zi ham ayni shu jamoa safida o‘ynamoqchi. Unda bunday istakning paydo bo‘lishiga hujumchi Krishtianu Ronalduning «Yuve»ga ko‘chib o‘tgani sabab bo‘lgani taxmin qilinmoqda.

Qayd etilishicha, himoyachi ayniqsa hozirgi inqiroz davrida klubni tark etishni istayotgani «Real» prezidenti Florentino Peresga yoqmayapti. Ammo tajribali funktsioner uni ushlab qolish qiyinligini ham tushunib turibdi.

Eslatib o‘tamiz, avvalroq ushbu manba tomonidan «Real» Marseloga 50-60 million yevro atrofida transfer qiymati belgilangani xabar qilingan edi.