Kun.Uz maqolasidan so‘ng: Navoiy adliya boshqarmasi fuqarolar haqini undirish maqsadida hokimlikni sudga berdi

Navoiy viloyati adliya boshqarmasi Navoiy shahar hokimligini fuqarolar haq-huquqlarini himoya qilish maqsadida Fuqarolik ishlari bo‘yicha Karmana tumanlararo sudiga bergan. Bu borada shahar prokuraturasi bilan hamkorlik qilingan. Viloyat adliya boshqarmasi Inson huquqlarini himoya qilish bo‘limi boshlig‘i Davron Husanov Kun.Uz muxbiri bilan muloqotda shu haqda ma'lum qildi.

Video: Tas-IX

Video: YouTube

Shu yilning 4 sentabr kuni “Navoiylik fuqarolarga buzilgan uylari uchun tovon puli berish rad etilmoqda, sababi nimada?” sarlavhali tanqidiy maqola (lavha iyul oyi o‘rtalarida suratga olingan) e'lon qilingan edi. Unda Navoiy shahar G‘alaba shoh ko‘chasini kengaytirish munosabati bilan 165dan ortiq yakka tartibdagi uy-joylar buzilgani, biroq 17 oiladan boshqa fuqarolar, jumladan tahririyatga murojaat qilganlarga ham tovon puli berilmagani, uy-joylari buzilganlarga kompensatsiya puli berish rad etib kelingani, sud mahkamalarining barcha bosqichlari shahar hokimining har bir fuqaro uchun alohida qarori mavjud emasligini ro‘kach qilib, hokimlikdan tovon puli undirish bo‘yicha da'vo arizalarini rad etib kelgani va boshqa masalalar yoritilgan edi. 

Tahririyat tasvirga olish guruhi oktabr oyi boshida mazkur va boshqa tanqidiy maqolalardagi faktlarni viloyat mutasaddi idoralari qay tarzda o‘rganganini bilish maqsadida Navoiy viloyatiga yana bir bor tashrif buyurdi. Dastavval odatdagidek, murojaatchilar bilan uchrashdik.

Murojaatchilarning aytishlaricha, tanqidiy maqola e'lon qilinganidan so‘ng, viloyat Adliya boshqarmasi fuqarolarni chaqirgan hamda prokuratura bilan birgalikda muammoni yechib berishini bildirgan. Adliya boshqarmasi xodimi, Navoiy shahar hokimligidan tovon puli undirish maqsadida fuqarolar manfaatlari ko‘zlangan holda da'vo arizasi kiritilishini, buzilgan uy-joylarni baholash bo‘yicha maxsus ekspertiza o‘tkazilib, barcha zararlar undirilishini ta'kidlagan.

Murojaatchilar bilan muloqotni poyoniga yetkazganimizdan so‘ng, shahar prokuraturasiga borib, mazkur muammo yuzasidan o‘rganishlarni olib borgan xodima Mohina Mirzayeva bilan uchrashishni niyat qildik. Biroq Mirzayeva boshqa tumanga ishga o‘tganligi sababli u bilan uchrashish imkoni bo‘lmadi. Ammo, shahar prokuraturasi mas'ul xodimi Sherzod Haydarovning bildirishicha, Mirzayeva masalani viloyat adliya boshqarmasi bilan hamkorlikda o‘rganib, Fuqarolik ishlari bo‘yicha Karmana tumanlararo sudiga Navoiy shahar hokimligi ustidan fuqarolar haq-huquqlarini tiklash maqsadida ariza topshirishda ishtirok etgan. 

Biz shahar prokuraturasidan chiqib, fuqarolik sudiga topshirilgan arizani ko‘rib chiqish qaysi bosqichda ekanini aniqlash, fuqarolar haq-huquqlari himoya qilinishi xususida qanday ishlar amalga oshirilayotganini bilish maqsadida viloyat adliya boshqarmasiga ham tashrif buyurdik. Bu yerda viloyat Adliya boshqarmasi Inson huquqlarini himoya qilish bo‘limi boshlig‘i Davron Husanov bilan suhbatlashdik.

“Kun.Uz saytida maqola e'lon qilinganidan so‘ng, Navoiy shahar prokuraturasi bilan hamkorlikda ushbu fuqarolarning muammolarini o‘rganib chiqdik. Aniqlanishicha, ushbu ko‘chaning ikki yon tarafidagi uylar “Umid nihollari” sport musobaqalari munosabati bilan yo‘lning kengaytirilishi sababli buzilishi belgilangan. Biroq, Vazirlar mahkamasining aynan shu qarorida uy-joyi buziladigan 165 fuqaroning ro‘yxati shakllantirilmagan. Keyinchalik, shahar hokimining tegishli qarori bilan 17 nafar uyi buzilgan fuqaroga Karmana tumanidan yer uchastkalari ajratish va kompensatsiya pullarini to‘lab berish amalga oshirilgan. Shundan so‘ng, ayrim fuqarolar mustaqil ravishda sudga murojaat qilib, ular ham tovon pullari olgani ma'lum bo‘lgan”, - dedi Davron Husanov.

Uning ta'kidlashicha, maqolani o‘rganish jarayonida tahririyatga murojaat qilgan fuqarolar, mahalla, viloyat Arxitektura va qurilish boshqarmasi, viloyat “Yermulkkadastr” DUK bilan hamkorlikda tegishli hujjatlar to‘plangan. Biroq, masalaning bir tarafi borki, bugungi kunda uylar buzilgan, ularning kompensatsiya miqdorini aniqlash uchun qurilish-texnikaviy ekspertizasini tayinlash kerak bo‘ladi. 

“Navoiy shahar hokimligidan 6 nafar fuqaro manfaatlarini ko‘zlab, ularga kompensatsiya va ma'naviy zararni undirish maqsadida Karmana tuman fuqarolik sudiga Navoiy shahar prokuraturasi bilan hamkorlikda da'vo arizasi kiritdik. Hozirda Yangiariq va Istiqlol mahallalarida uylari buzilgan va tovon puli olmagan fuqarolar bo‘lsa, bizlarga murojaat qilishlari mumkinligi aytilgan”, - dedi Navoiy viloyati Adliya boshqarmasi bo‘lim boshlig‘i.

Uning so‘zlariga ko‘ra, fuqarolarning buzilgan haq-huquqlari sud tartibida tiklanishi va ularga kompensatsiya va ma'naviy zarar pullari undirib berilishiga umid qilsa bo‘ladi. 

Maqola tayyorlanish jarayonida ma'lum bo‘lishicha, Fuqarolik ishlari bo‘yicha Karmana tuman sudiga kiritilgan da'vo arizasi ro‘yxatiga yana bir fuqaro ism-sharifi qo‘shilgan va Adliya boshqarmasi 7 kishining manfaatini himoya qiladi. 

Kun.Uz tahririyati fuqarolar haq-huquqlari, manfaatlari tiklanishiga umid va ishonch bildirib qoladi.