Kanada poytaxti Ottavadan 30 km uzoqlikda joylashgan Karp shahri osmonida ikkita yengil motorli samolyot to‘qnashib ketdi.
Voqea mahalliy vaqt bilan soat 10:11 atrofida yuz bergan. Samolyotlardan biri to‘qnashuvdan keyin ekin maydoniga qulagan. Ikkinchi samolyot esa Ottava xalqaro aeroportiga yo‘naltirilgan va u yerda muvaffaqiyatli qo‘na olgan. Bu samolyot 11 kishilik Piper Cheyenne samolyoti bo‘lib, uning bortida 2 kishi bo‘lgan.
Qo‘ngan samolyot uchuvchisi boshqa samolyot uning samolyoti tubiga urilib, o‘ng shassisiga tekkanini ma'lum qilgan.
Politsiyada qulagan samolyot bortida necha kishi bo‘lgani, ular omon qolgan-qolmagani ma'lum qilinmagan. Biroq tibbiy doiralardagi manbaning ma'lum qilishicha, qulagan samolyot uchuvchisi voqea joyida halok bo‘lgan.
Voqea joyida qutqaruvchilar, shifokorlar va politsiyachilar ish olib borgan.
